వేసవిలో భక్తుల సౌకర్యార్థం విస్తృత ఏర్పాట్లు

17 నుంచి శ్రీ పద్మావతి పరిణయోత్సవాలు
తితిదే ఈవో ఏవీ ధర్మారెడ్డి

తిరుమల, న్యూస్‌టుడే: వేసవి సెలవుల్లో శ్రీవారి దర్శనార్థం వచ్చే భక్తులకు ఎలాంటి అసౌకర్యం కలగకుండా విస్తృత ఏర్పాట్లు చేసినట్లు తితిదే ఈవో ఏవీ ధర్మారెడ్డి తెలిపారు. శుక్రవారం డయల్‌ యువర్‌ ఈవో కార్యక్రమంలో ఆయన మాట్లాడుతూ ఈనెల 17 నుంచి 19వ తేదీ వరకు తిరుమలలో శ్రీ పద్మావతి పరిణయోత్సవాలు, 22న నారాయణగిరి ఉద్యాన వనంలో మాతృశ్రీ తరిగొండ వెంగమాంబ జయంతి ఉత్సవాలు నిర్వహిస్తామని చెప్పారు. తిరుమలలోని ఆకాశగంగ వద్ద బాలాంజనేయ స్వామివారి ఆలయంలో జూన్‌ 1 నుంచి 5వ తేదీ వరకు హనుజ్జయంతి ఉత్సవాలు ఘనంగా నిర్వహించేందుకు ఏర్పాట్లు చేసినట్లు వెల్లడించారు.

 ఏప్రిల్‌ హుండీ కానుకలు రూ.101.63 కోట్లు: తిరుమల శ్రీవారిని ఏప్రిల్‌ నెలలో 20.17 లక్షల మంది దర్శించుకున్నారు. హుండీ కానుకలు  రూ.101.63 కోట్లు లభించాయి. భక్తులు 94.22 లక్షల లడ్డూలు కొనుగోలు చేశారు. అన్నప్రసాదం 39.73 లక్షల మంది స్వీకరించారు. స్వామివారికి    8.08 లక్షల మంది తలనీలాలు సమర్పించారు.