ఎయిర్‌టెల్‌, వొడాఫోన్‌ ఐడియా, జియోలకు రూ.9200 కోట్ల బ్యాంక్‌ హామీల విడుదల

దిల్లీ: లైసెన్స్‌ ఫీజు, స్పెక్ట్రమ్‌ వినియోగ ఛార్జీల కోసం భారతీ ఎయిర్‌టెల్‌, వొడాఫోన్‌ ఐడియా, రిలయన్స్‌ జియోలు డిపాజిట్‌ చేసిన దాదాపు రూ.9200 కోట్ల బ్యాంక్‌ హామీలను టెలికాం విభాగం (డాట్‌) విడుదల చేసిందని సంబంధిత వర్గాలు వెల్లడించాయి. సెప్టెంబరులో టెలికాం రంగానికి ప్రభుత్వం ప్రకటించిన ఉపశమన ప్యాకేజీలో భాగంగా డాట్‌ ఈ చర్యలు చేపట్టింది. గత నెలలో ఎయిర్‌టెల్‌కు దాదాపు రూ.4000 కోట్లు, వొడాఫోన్‌ ఐడియాకు రూ.2500 కోట్లు, జియోకు రూ.2700 కోట్ల మేర బ్యాంక్‌ హామీలు విడుదలయ్యాయని సమాచారం. టెలికాం ఆపరేటర్ల బ్యాంక్‌ హామీ అవసరాల్లో 80 శాతం మేర డాట్‌ కోత విధించిన విషయం తెలిసిందే.