Mahindra: కెనడాలో ‘మహీంద్రా’ అనుబంధ సంస్థ మూత!

దిల్లీ: మహీంద్రా అండ్‌ మహీంద్రా (Mahindra & Mahindra) గ్రూప్‌నకు కెనడాలో అనుబంధంగా పనిచేస్తున్న ‘రెస్సన్‌ ఏరోస్పేస్‌ కార్పొరేషన్‌’ తమ కార్యకలాపాలను మూసివేసింది. ఈ విషయాన్ని ఎంఅండ్‌ఎం (Mahindra & Mahindra) గురువారం రెగ్యులేటరీ ఫైలింగ్‌లో వెల్లడించింది. భారత్‌, కెనడా మధ్య దౌత్యపరమైన ఇబ్బందులు కొనసాగుతున్న తరుణంలో ఈ పరిణామం చోటుచేసుకోవడం ఇప్పుడు చర్చనీయాంశంగా మారింది. ముంబయి కేంద్రంగా పనిచేస్తున్న ఎంఅండ్‌ఎం (Mahindra & Mahindra)కు రెస్సన్‌లో 11.18 శాతం వాటాలున్నాయి.

‘రెస్సన్‌ ఏరోస్పేస్ కార్పొరేషన్‌’ స్వచ్ఛందంగా తమ కార్యకలాపాలను మూసివేస్తున్నట్లు పేర్కొంటూ కెనడా కార్పొరేషన్స్‌కు దరఖాస్తు చేసుకుంది. అందుకు సెప్టెంబర్‌ 20న ఆమోదం లభించింది. దీంతో కంపెనీ మూతపడింది. ఫలితంగా ఆ సంస్థతో తమ అనుబంధం కూడా ముగిసినట్లు ఎంఅండ్‌ఎం ఫైలింగ్‌లో తెలిపింది. మూసివేతకు కారణాలను మాత్రం ఎక్కడా వెల్లడించలేదు. కానీ, ప్రస్తుతం ఇరుదేశాల మధ్య నెలకొన్న పరిస్థితుల నేపథ్యంలో ఈ పరిణామానికి ప్రాధాన్యం ఏర్పడింది.

రెస్సన్‌ మూసివేత వల్ల ఎంఅండ్‌ఎంకు 4.7 మిలియన్‌ కెనడా డాలర్లు (దాదాపు రూ.28.7 కోట్లు) లభించనున్నాయి. ‘క్లాస్‌ సి ప్రిఫర్డ్‌ షేర్ల’ కింద ఈ మొత్తం తమకు అందనున్నట్లు ఎంఅండ్‌ఎం తెలిపింది. స్టాక్‌ మార్కెట్‌లో ఎంఅండ్‌ఎం షేరు శుక్రవారం మధ్యాహ్నం 2:32 గంటల సమయంలో 1.45 శాతం నష్టపోయి రూ.1,606.70 దగ్గర స్థిరపడింది.