Crime Newss: ఫేక్‌ ఆఫర్‌ లెటర్లతో మోసం.. పోలీసులను ఆశ్రయించిన బాధితులు

చంద్రగిరి: సాఫ్ట్‌వేర్‌ ఉద్యోగాల పేరిట ఓ వ్యక్తి మోసానికి పాల్పడ్డాడు. తమకు న్యాయం చేయాలంటూ హైదరాబాద్‌, నెల్లూరు, ఒంగోలు, మాచర్ల నుంచి నిరుద్యోగుల తల్లిదండ్రులు చంద్రగిరి పోలీస్‌స్టేషన్‌కు క్యూ కట్టారు. దీంతో విషయం వెలుగులోకి వచ్చింది. 

చంద్రగిరికి చెందిన పాశం గురుప్రసాద్, అతడి స్నేహితుడు బండకింద రెడ్డప్ప నిరుద్యోగుల నుంచి సుమారు రూ.50లక్షలు వసూలు చేశారని బాధితుల తల్లిదండ్రులు తెలిపారు. ప్రముఖ సంస్థల్లో హెచ్‌ఆర్‌ మేనేజర్‌గా పనిచేస్తున్నట్లు గురుప్రసాద్‌ పరిచయం చేసుకునేవాడని చెప్పారు. విప్రో, టెక్‌ మహీంద్రా తదితర కంపెనీల పేరుతో మెయిల్స్‌ ద్వారా ఫేక్‌ ఆఫర్‌ లెటర్లు పంపించేవాడన్నారు. వాటితో ఆయా కంపెనీలకు వెళితే మోసపోయినట్లు తెలిసిందని వివరించారు. గురు ప్రసాద్‌, రెడ్డప్ప ఖాతాలో చాలా మంది బాధితులు ఉన్నారని చెప్పారు. తమకు న్యాయం చేయాలని పోలీసులకు ఫిర్యాదు చేశారు.