Cyber Crime: భారీ మోసం.. చెల్లింపు సేవల సంస్థకు హ్యాకర్ల షాక్‌

ఖాతాల నుంచి రూ.16 వేల కోట్లు మాయం

ఠాణె: మహారాష్ట్రలోని ఠాణేలో జరిగిన ఓ భారీ సైబర్‌ మోసం పోలీసులను విస్తుపోయేలా చేసింది. ఒక చెల్లింపు సేవల సంస్థకు చెందిన వ్యవస్థను హ్యాక్‌ చేసిన దుండగులు వేల బ్యాంకు ఖాతాల నుంచి విడతల వారీగా రూ.16,180 కోట్లు దోచుకున్నారు. ఎంతో కాలంగా ఈ మోసం జరుగుతున్నప్పటికీ నిర్వాహకులు గుర్తించలేకపోయారు. ఈ ఏడాది ఏప్రిల్‌లో రూ.25 కోట్ల మేర మోసం జరిగిందని నిర్వాహకులు చేసిన ఫిర్యాదుతో పోలీసులు తీగ లాగగా డొంకంతా కదిలింది. తాజాగా ఈ కేసుకు సంబంధించి గతంలో వివిధ బ్యాంకుల్లో రిలేషన్‌షిప్‌, సేల్స్‌ మేనేజర్‌గా పనిచేసిన జితేంద్ర పాండేతో పాటు సంజయ్‌ సింగ్‌, అమోల్‌ అండాలే, అమన్‌ కేదార్‌, సమీర్‌ డియ్‌ఘేలపై ఎఫ్‌ఐఆర్‌ నమోదైంది. ఇంకా ఎవరినీ అరెస్టు చేయలేదని తెలిపిన పోలీసులు.. ఈ భారీ రాకెట్‌ వెనుక మరికొందరు ఉండొచ్చని అభిప్రాయపడ్డారు. నిందితుల నుంచి కొన్ని నకిలీ డాక్యుమెంట్లను సేకరించామని, పూర్తిస్థాయిలో దర్యాప్తు కొనసాగుతోందని వెల్లడించారు. దేశవ్యాప్తంగా ఈ చెల్లింపు సేవల సంస్థతో లావాదేవీలు జరిపిన వివిధ సంస్థలు, వ్యక్తులపై ఈ మోసం ప్రభావం పడి ఉండొచ్చని పోలీసులు భావిస్తున్నారు.