కుమారుణ్ని కొట్టిచంపి.. గోనెసంచిలో చుట్టి పడేశారు!

ఇందౌర్‌: మధ్యప్రదేశ్‌లోని ఇందౌర్‌లో కుమారుణ్ని తల్లిదండ్రులే కొట్టిచంపి గోనెసంచిలో చుట్టి బయట పడేశారు. ఇందౌర్‌ విమానాశ్రయ పోలీస్‌స్టేషను పరిధిలో ఏప్రిల్‌ 26న గోనెసంచిలో చుట్టి ఉన్న మృతదేహం పారిశుధ్య కార్మికులకు కనిపించింది. మృతదేహాన్ని చుట్టిన గోనెసంచిపై ఉన్న చిరునామా ఆధారంగా పోలీసులు నిందితులను పట్టుకున్నారు. మృతుడు సుధాంశు ఏప్రిల్‌ 24న కన్నతల్లిని దారుణంగా వేధించాడు. ఈ విషయాన్ని ఆమె భర్తకు చెప్పింది. దంపతులిద్దరూ కలిసి తెల్లవారుజామున సుధాంశును సుత్తి, స్క్రూడైవరుతో కొట్టి హత్య చేశారు. మృతదేహాన్ని రెండు రోజులు ఇంట్లోనే ఉంచాక దుర్వాసన రావడంతో సుధాంశు తండ్రి రాజారామ్‌ ఏప్రిల్‌ 26 తెల్లవారుజామున బైక్‌పై తీసుకువెళ్లి నిర్జన ప్రదేశంలో పడేశాడు. సమీపంలో ఉన్న సీసీటీవీలో ఈ దృశ్యాలు రికార్డయ్యాయి. రాజారామ్‌ను అరెస్టు చేశామని, తల్లిని నిందితురాలిగా చేర్చినట్లు ఇందౌర్‌ డీసీపీ వినోద్‌కుమార్‌ మీనా తెలిపారు.