సుమోటోగా నల్గొండ ఘటన

మహిళా కమిషన్‌ ఛైర్‌పర్సన్‌ సునీతా లక్ష్మారెడ్డి

ఈనాడు, హైదరాబాద్‌: నల్గొండ పట్టణానికి చెందిన యువతిపై ప్రేమోన్మాది దాడి ఘటనను తెలంగాణ మహిళా కమిషన్‌ సుమోటోగా తీసుకుంది. ఈ ఘటనకు పాల్పడిన ఉన్మాదిని వెంటనే అదుపులోకి తీసుకోవాలని నల్గొండ జిల్లా కలెక్టర్‌, ఎస్పీలను కమిషన్‌ ఛైర్‌పర్సన్‌ సునీతా లక్ష్మారెడ్డి బుధవారం ఆదేశించారు. ప్రేమ పేరిట ఇలాంటి దారుణాలకు పాల్పడుతున్న యువకులను కఠినంగా శిక్షించాలని సూచించారు. కళాశాల స్థాయిలో పిల్లలపై తల్లిదండ్రుల పూర్తిస్థాయి పర్యవేక్షణ ఉండాలని తెలిపారు. ఈ ఘటనపై సమగ్ర విచారణ చేసి కమిషన్‌కు నివేదిక ఇవ్వాలని, ఇలాంటి ఘటనలు పునరావృతం కాకుండా పోలీసుశాఖ చర్యలు తీసుకోవాలని కోరారు.