Germany: స్కూల్‌లో బొమ్మ తుపాకీతో బెదిరింపులు.. ఇద్దరు బాలురు అరెస్టు

బెర్లిన్‌: తరగతి గదులోకి చొరబడి బొమ్మ తుపాకీ (Toy Gun) తో బెదిరింపులకు పాల్పడిన నలుగురు బాలురను జర్మనీ (Germany) పోలీసులు అదుపులోకి తీసుకున్నారు. బుధవారం ఉదయం హాంబర్గ్‌లోని బ్లాంకెనీస్‌లో ఉన్న ఓ పాఠశాలలో ఈ ఘటన చోటుచేసుకుంది. మొదట దుండగులు తుపాకీతో బెదిరించినట్లు పాఠశాల నుంచి పోలీసులకు సమాచారం అందింది. వెంటనే అక్కడికి చేరుకున్న పోలీసులు.. విద్యార్థులందరినీ అక్కడి నుంచి స్థానిక మిలటరీ స్థావరానికి తరలించారు. దర్యాప్తు చేపట్టిన పోలీసులు 12 - 14 ఏళ్ల వయసున్న నలుగురు బాలురని అదుపులోకి తీసుకున్నారు. వారి నుంచి రెండు బొమ్మ తుపాకీలను స్వాధీనం చేసుకున్నారు. వారిలో ఇద్దరే ఈ బెదిరింపులకు పాల్పడినట్లు పోలీసులు నిర్థారించారు. దర్యాప్తును కొనసాగించనున్నట్లు పోలీసులు తెలిపారు.