Guntur: ఇసుక రీచ్‌ వద్ద దాడి.. ఇరువర్గాలపై కేసు నమోదు

కొల్లిపర: గుంటూరు జిల్లా కొల్లిపర మండలం మున్నంగి గ్రామంలో ఇసుక రీచ్‌లో దాడికి పాల్పడిన ఇరువర్గాలపై కేసులు నమోదయ్యాయి. ఎస్సై ఆర్‌.రవీంద్రారెడ్డి తెలిపిన వివరాల ప్రకారం.. శుక్రవారం రాత్రి మున్నంగి వాగులో ఇసుక  తరలింపును గ్రామస్థులు అడ్డుకున్నారు. భూగర్భజలాలు అడుగంటిపోతున్నాయని నిరసన వ్యక్తం చేసిన వారిపై వైకాపా నేతలు, ఇసుక మాఫియా సాగిస్తున్న పలువురు దాడి చేశారు. ఈ ఘటనలో మున్నంగి గ్రామానికి చెందిన వేమూరి బాలరాజు, వేమూరి అశోక్‌, కొండూరి మహేశ్‌, వేమూరి మహేశ్‌, మోజేశ్‌కు గాయాలయ్యాయి. వారిని వెంటనే చికిత్స నిమిత్తం తెనాలి ఆస్పత్రికి తరలించారు. గ్రామస్థుడు వేమూరి అశోక్‌ ఇచ్చిన ఫిర్యాదు మేరకు పోలీసులు కేసు నమోదు చేశారు. మరోవైపు ఇసుక మాఫియాకు చెందిన వారు.. తాము కూడా గాయపడ్డామని పోలీసు స్టేషన్‌లో ఫిర్యాదు చేయడంతో కేసు నమోదైంది.