అనాథలైన చిన్నారులకు మేమున్నామని..

ఆర్థిక సహాయం అందజేస్తున్న ఎంఈఎఫ్‌ నాయకులు

నిర్మల్‌ అర్బన్‌, న్యూస్‌టుడే: ఖానాపూర్‌ పురపాలికలో పొరుగు సేవల్లో ఉద్యోగినిగా విధులు నిర్వర్తిస్తున్న అంబేడ్కర్‌ కాలనీకి చెందిన సంగర్తి కవిత ఇటీవల విద్యుదాఘాతానికి గురై మృతి చెందారు. భర్త సంగర్తి జానీ ఉపాధి కోసం గల్ఫ్‌కు వెళ్లి అక్కడే గుండెపోటుతో అంతకుముందే మృత్యువాత పడ్డారు. దీంతో ఆ దంపతుల 12 ఏళ్ల కుమారుడు, 9 ఏళ్ల కూతురు అనాథలుగా మిగిలారు. వారి దీనస్థితిని చూసిన మాదిగ ఎంప్లాయీస్‌ ఫెడరేషన్‌ (ఎంఈఎఫ్‌) ఆధ్వర్యంలో రూ.50,600 జమ చేశారు. వీటిని జిల్లా కేంద్రంలో చిన్నారులకు మంగళవారం అందజేశారు. కార్యక్రమంలో జిల్లా అధ్యక్షుడు తెడ్డు లింగన్న, రాష్ట్ర నిర్వహణ కార్యదర్శి కుంటాల పోశెట్టి, కార్యదర్శి ఆనందబాబు, నాయకులు గడ్‌చాంద ముత్యం, సొన్న గంగాధర్‌, టి.రాజు, రత్నపురం లక్ష్మణ్‌, సంగర్తి నాగరాజు తదితరులు పాల్గొన్నారు.