రేపు పవన్‌ రాక!

త్వరలో చంద్రబాబు కూడా?

హనుమాన్‌జంక్షన్‌, న్యూస్‌టుడే: జనసేన అధినేత పవన్‌ కల్యాణ్‌ ఈ నెల 7న గన్నవరం నియోజకవర్గంలో పర్యటించనున్నారు. ఎన్నికల ప్రచారంలో భాగంగా గన్నవరం కూటమి అభ్యర్థి యార్లగడ్డ వెంకట్రావుకు మద్దతుగా ఆయన రానున్నట్లు సమాచారం. ఈ క్రమంలో హనుమాన్‌జంక్షన్‌లో పవన్‌ కల్యాణ్‌ పర్యటన ఉంటుందని, స్థానికంగా ఉన్న ఎస్‌ఆర్‌ కల్యాణ మండపం సమీపంలోని బహిరంగ ప్రదేశంలో వారాహి వాహనంపై నుంచి జనసేనాని ప్రసంగించేలా సన్నాహాలు చేస్తున్నారు. సోమవారం స్థల పరిశీలన, అనుమతులకు సంబంధించిన అంశాలపై స్పష్టత వస్తుందని, ఆ తర్వాత అధికారికంగా పర్యటన ఖరారు చేస్తామని తెదేపా-జనసేన నాయకులు చెబుతున్నారు. మరోపక్క ఈ నెల తొమ్మిదిన తెదేపా అధినేత చంద్రబాబు కూడా గన్నవరంలో ప్రచారం నిర్వహించేందుకు వీలుగా సన్నాహాలు చేస్తున్నట్లుగా ప్రచారం జరుగుతోంది.