వెజ్‌ తిరంగా.. నోరూరా తినంగా

జాతీయజెండా రంగులతో తయారుచేసిన ప్రత్యేక వంటకం

జిల్లాలోని హైదరాబాద్‌-బెంగళూరు జాతీయ రహదారిలో దాబాలు, రెస్టారెంట్‌లకు కొదవలేదు. గుత్తి బైపాస్‌ రోడ్డుకు కూతవేటు దూరంలో దసమేశ్‌ పంజాబీ దాబాలో వెజ్‌ తిరంగా పేరుతో తయారు చేసే వంటకం ప్రత్యేకమైనది. జాతీయజెండా రంగులతో ప్రత్యేకంగా తయారు చేసే ఈ వంటకం ఈ రహదారిలో తరచూ ప్రయాణించే వాళ్లకు పరిచయమే. మిక్స్‌డ్‌ వెజిటేబుల్‌ కూర కాషాయం రంగు, ప్రత్యేకమైన క్రీమ్‌, జీడిపప్పుతో చేసిన కూర తెల్లరంగులో, పాలకూరతో చేసిన కూర ఆకుపచ్చ రంగులో చేసి మూడింటిని ఒక ప్లేట్లో పెట్టి కస్టమర్లకు అందిస్తారు. ఈ దాబాలో వెజ్‌ తిరంగా ఒకసారి తిన్నవారు మళ్లీ వచ్చినప్పుడు తప్పకుండా ఆరగిస్తారని దాబా యజమానులు తెలిపారు. రూ.250కు అందిస్తున్నారు.  

- ఈనాడు, అనంతపురం