కేవైసీ పేరిట మున్సిపల్‌ ఉద్యోగికి టోకరా

జూబ్లీహిల్స్‌, న్యూస్‌టుడే: కేవైసీ పేరుతో మున్సిపల్‌ ఉద్యోగికి సైబర్‌ నేరగాళ్లు టోకరా వేశారు. జూబ్లీహిల్స్‌ పోలీసుల కథనం ప్రకారం.. యూసుఫ్‌గూడ సమీపంలోని జవహర్‌నగర్‌లో నివసించే మున్సిపల్‌ ఉద్యోగి ఆర్‌.శ్రీధర్‌రావు చరవాణికి ఈనెల 6న బ్యాంకు ఖాతాకు సంబంధించి పాన్‌ కార్డు నవీకరణతోపాటు కేవైసీ చేసుకోవాలంటూ సంక్షిప్త సందేశం వచ్చింది. దీంతో లింకును తెరిచి వివరాలు పొందుపరిచి, వచ్చిన ఓటీపీని నమోదు చేశారు. దీంతో ఖాతా నుంచి రూ.39,999 విత్‌డ్రా అయినట్లు సందేశం వచ్చింది. ఈ మేరకు ఆయన జూబ్లీహిల్స్‌ పోలీసులకు ఫిర్యాదు చేశారు. పోలీసులు కేసు నమోదు చేసి దర్యాప్తు చేస్తున్నారు.