అనుమతి లేని ఆసుపత్రుల మూసివేత

చిలుకానగర్‌లో ప్రైవేటు ఆసుపత్రిని సీజ్‌ చేస్తున్న వైద్యాధికారులు

హబ్సిగూడ, న్యూస్‌టుడే: మేడ్చల్‌ జిల్లా వైద్య, ఆరోగ్యశాఖ అధికారులు బుధవారం చిలుకానగర్‌లో ఆకస్మిక తనిఖీలు చేసి అనుమతి లేని వైద్యశాలలను సీజ్‌ చేశారు. వాటిలో ఉప్పల్‌లోని శ్రీమణికంఠ హెల్త్‌ కేర్‌ అండ్‌ పాలీ క్లినిక్‌, చిలుకా నగర్‌లోని రాజు ఫస్ట్‌ ఎయిడ్‌ క్లినిక్‌లను సీజ్‌ చేసినట్లు ఆరోగ్యశాఖ అధికారి డా.రఘునాధస్వామి, డిప్యూటీ జిల్లా అధికారి నారాయణరావు తెలిపారు. అర్హత కలిగిన వైద్యులు లేరని, ప్రజల ప్రాణాలతో చెలగాటం ఆడుతున్నారని పేర్కొన్నారు. అనుమతి లేని ఆసుపత్రులను నడిపిస్తే చట్టపరమైన చర్యలు తీసుకుంటామని హెచ్చరించారు. దస్తావేజులు లేని మహాలక్ష్మి క్లినిక్‌ (చిలుకానగర్‌)కు నోటీసులను జారీ చేశారు. తనిఖీల్లో ఉప్పల్‌ వైద్యురాలు డా.సౌందర్యలత పాల్గొన్నారు.