ఆ ఊట నీళ్లే వారికి అమృతం.. 30 ఏళ్లుగా తాగుతున్న ఆదివాసీలు

చర్ల: చర్ల మండలంలోని మారుమూల పల్లె వెంకటచెరువులో ఆదివాసీలు ఇప్పటికీ ఊటనీటినే తాగుతున్నారు. మంచినీటి బోర్లు ఉన్నప్పటికీ ఆ నీటిని ఇతర అవసరాలకు వినియోగిస్తూ.. గ్రామానికి 2 కి.మీ. దూరంలో ఉన్న ఎతైన గుట్ట కింద వస్తున్న ఊట నీళ్లనే అమృతంగా భావించి తాగుతున్నారు. గతంలో ఇక్కడ ఈత చెట్టును తొర్రగా చేసి దాని నుంచి వచ్చే నీళ్లనే ఆదివాసీలు తాగేవారు. ప్రస్తుతం చెట్టు తొర్రను తొలగించి సిమెంట్‌ తూరలను ఏర్పాటు చేశారు. ఎంతో రుచిగా.. వేసవిలో మరెంతో చల్లగా ఉండే ఊట నీళ్లు తమకు అమృతం లాంటివని.. వాటిని తప్ప వేరే నీటిని తాగమని వెంకటచెరువు ఆదివాసీలు చెబుతున్నారు. ఆశ్చర్యమేంటంటే.. మండు వేసవిలోనూ చెలమల నుంచి కావాల్సినంత నీరు ఊరుతుండటం విశేషం.