లారీ ఢీకొని చిరుద్యోగి దుర్మరణం

విధులకు వెళ్తుండగా ప్రమాదం

బిజ్జు రాజు

కాప్రా, న్యూస్‌టుడే : ఉదయమే విధులకు బయలుదేరిన యువకుడిని లారీ రూపంలో మృత్యువు కబళించింది. కుషాయిగూడ ఎస్‌ఐ నాగుల ఉపేందర్‌ కథనం ప్రకారం..  వనపర్తి మండలం కడుకుంట్ల గ్రామానికి చెందిన బిజ్జ రాజు (30) పదో తరగతి చదువుకున్నాడు. జీవనోపాధి కోసం పదేళ్ల క్రితం నగరానికి వచ్చి నేరేడ్‌మెట్‌లోని గోకుల్‌నగర్‌లో నివాసం ఉంటున్నాడు. భార్య మంజుల, అయిదేళ్ల కుమారుడు హర్షవర్ధన్‌ ఉన్నారు. ఏడాదిగా నాగారంలో పెద్దారెడ్డి స్వీట్‌ షాపులో పని చేస్తున్నాడు. గురువారం ఇంటి నుంచి దుకాణానికి బైక్‌పై బయలు దేరాడు. ఈసీఐఎల్‌ నుంచి నాగారం రేడియల్‌ రోడ్డుపై వెళ్తూ.. నాగార్జునగర్‌ కాలనీకి వచ్చేసరికి వెనుక నుంచి వేగంగా వచ్చిన లారీ  ఢీట్టింది. తలకు తీవ్రగాయాలై అక్కడికక్కడే దుర్మరణం చెందాడు. హెల్మెట్‌ ఉన్నా ప్రాణాలు దక్కలేదు. లారీ ఆగకుండా వెళ్లిపోయింది. కీసర మార్గంలో రోడ్డు పక్కన ఆపి డ్రైవర్‌ పరారైనట్లు పోలీసులు గుర్తించారు. భార్య మంజుల ఫిర్యాదు మేరకు కేసు నమోదు చేశారు.