logo
Updated : 17 Aug 2022 11:10 IST

అంకాపూర్‌ రుచి.. అమెరికా చేరి

రోజుకు 600 పార్శిళ్లు.. రూ. 4 లక్షల వ్యాపారం

న్యూస్‌టుడే, ఆర్మూర్‌ గ్రామీణం

చుట్టూ పచ్చని పంటచేలు.. నగరాన్ని తలపించేలా అందమైన భవనాలతో కొలువుదీరిన అంకాపూర్‌ వ్యవసాయంలో ఎంత పేరు తెచ్చుకుందో అదే స్థాయిలో నాటుకోడి కూరను వండటంలో పేరుగాంచింది. ఇతర చోట్ల ఎక్కడ తిన్నా ఈ రుచి రాదు.

దాదాపు 40 ఏళ్ల కిందట గ్రామంలో మొదట తాళ్లపల్లి రామాగౌడ్‌ అనే వ్యక్తి ఈ నాటుకోడి కూర వండటం ప్రారంభించారు. ఈయన చేసే చికెన్‌ కారంగా, ఘాటుగా అద్భుతమైన రుచి ఉండటంతో.. స్థానికంగా అందరి నోళ్లలో పడి మెల్లమెల్లగా జిల్లా కేంద్రంతో పాటు చుట్టుపక్కల జిల్లాలకు పాకింది. ఇది తినేందుకే ఆదివారాలు ఇక్కడికి వచ్చే వారున్నారు. రోజురోజుకు డిమాండ్‌ పెరుగుతుండటంతో కుటుంబమంతా ఆర్డర్‌ మీద కావాల్సిన వాళ్లకు పంపించే వ్యాపారం కొనసాగించారు. క్రమంగా ఊర్లో ఇతరులూ ఆర్డర్‌ మెస్‌లు ప్రారంభించారు. మొదట్లో చుట్టుపక్కల గ్రామాల వారికి సరఫరా చేయగా ప్రస్తుతం గల్ఫ్‌దేశాలు, అమెరికాకు సైతం పార్శిళ్లు వెళ్తున్నాయి.

ప్రస్తుతం గ్రామంలో సుమారు 20 మంది ఈ ప్రత్యేక వంటకం నేర్చుకొని వ్యాపారం చేస్తున్నారు. వ్యవసాయరంగంలో ఈ గ్రామానికి జాతీయ స్థాయిలో ప్రత్యేక గుర్తింపు రావడంతో ఇక్కడికి రైతులు, సందర్శకులు నిత్యం వందల మంది వచ్చిపోతుంటారు. పాతికేళ్లుగా దేశ విదేశాల అతిథులు ఇక్కడికి వచ్చి రైతులు చేస్తున్న వినూత్న వ్యవసాయంపై అధ్యయనం చేసి స్థానిక రుచులను ఆస్వాదించి వెళ్తున్నారు. అలా అంకాపూర్‌ ‘దేశీ చికెన్‌’గా ఇక్కడి వంటకం ప్రత్యేకంగా పేరు సంపాదించుకుంది. కుటుంబంలో సుమారు నలుగురు ఉంటే అందరూ ఇదే వృత్తిలో ఉపాధి పొందుతున్నారు. ప్రస్తుతం గ్రామంలో 20 ఆర్డర్‌ మెస్‌లు వెలిశాయి. ఒక్కొక్క హోటల్‌లో సుమారు 30 కిలోల నాటుకోడి కూరను వండి ఆర్డర్‌ ద్వారా అందిస్తున్నారు. రూ.600 నుంచి రూ. 650కి ఒక్కో నాటుకోడి, నలుగురికి సరిపడా భోజనం (అన్నం) అందిస్తారు. గ్రామంలో నిత్యం రూ.4 లక్షల వరకు వ్యాపారం జరుగుతోంది. సాధారణ రోజుల్లో 2400 మంది, ఆదివారాలు 3500 మంది వరకు తింటారు.

ప్రత్యేకంగా మసాలాలు

నాటుకోడి కూర వండేందుకు మసాలాలు ప్రత్యేకంగా ఎప్పుటికప్పుడు తయారు చేసుకుంటారు. ధనియాలు, లవంగాలు, యాలకులు, కొబ్బరి పొడి, అల్లం, ఎల్లిగడ్డ, ఉల్లి, కొత్తిమీర, పుదీనా వంటకానికి ముందే దంచి పెట్టుకుంటారు. వంటలో వాడేందుకు నాణ్యమైన నూనె ఉపయోగిస్తారు.

ఎల్లలు దాటుతున్న రుచి

అంకాపూర్‌ దేశీ చికెన్‌ రుచి తెలిసిన వారు ఈ మార్గంలో ప్రయాణిస్తే తినకుండా వెళ్లరు. చుట్టుపక్కల ఎక్కడ సమావేశాలు, విందులు ఉన్నా ఈ ఊరు నాటుకోడి కూర విధిగా ఉండాల్సిందే. ముఖ్యమంత్రి కేసీఆర్‌ సైతం అంకాపూర్‌ పర్యటనకు వచ్చినప్పుడు రుచి ఆస్వాదించారు. నిజామాబాద్‌, ఆదిలాబాద్‌, జగిత్యాల, నిర్మల్‌, కరీంనగర్‌, హైదరాబాద్‌తో పాటు గల్ఫ్‌ దేశాలు, అమెరికాకు తీసుకెళ్తున్నారు.


రోజుకు 30 కిలోలు వండుతాం

- భూమేశ్‌, అంకాపూర్‌

ఇదే వృత్తిగా ఎంచుకొని కుటుంబంలో అందరం కలిసి పని చేస్తాం. చుట్టుపక్కల గ్రామాలు తిరిగి సహజ సిద్ధంగా పెరిగే దేశీ కోళ్లను కొనుగోలు చేస్తాం. కూరలో ఉపయోగించే కారం, మసాలాలు స్వయంగా తయారు చేసుకుంటాం. దీంతో వంటకానికి మంచి రుచి వస్తుంది. రోజుకు 30 కిలోల నాటుకోడి కూరను ఆర్డర్‌ ద్వారా అందిస్తా. రుచి, నాణ్యతగా పాటించడంతో డిమాండ్‌ ఉంటోంది.

Read latest Nizamabad News and Telugu News

Follow us on Facebook, Twitter, Instagram, Koo, ShareChat, and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts