తక్కువ ధరకు ఇళ్ల నిర్మాణ సామగ్రి

సమావేశంలో మాట్లాడుతున్న కలెక్టరు నిశాంత్‌కుమార్‌

పార్వతీపురం, న్యూస్‌టుడే: జిల్లాలో గృహ నిర్మాణ సంస్థ ఆధ్వర్యంలో చేపట్టిన  ఇళ్ల నిర్మాణానికి అవసరమైన సామగ్రిని తక్కువ ధరకు రాయితీపై ప్రభుత్వం అందిస్తోందని కలెక్టరు నిశాంత్‌కుమార్‌ తెలిపారు. బుధవారం కలెక్టరేట్‌లో గృహ నిర్మాణం, అమృత్‌ సరోవర్‌, ఉపాధి హామీ పథకాలపై ఆయన సమీక్షించారు. లబ్ధిదారులకు సిమెంటు, ఇనుము, శానిటరీ సామగ్రి వంటివి తక్కువ ధరకు ప్రభుత్వం అందిస్తోందని, తద్వారా నిర్మాణాల్లో వేగం పెరుగుతుందన్నారు. ‘జగనన్నకు చెబుదాం’ కార్యక్రమంలో పరిష్కారాలు సంతృప్తికరంగా ఉండాలని, అపరిష్కృతంగా ఉన్నవి శనివారానికి పరిష్కరించాలన్నారు. అర్జీదారులతో నేరుగా మాట్లాడి, సంభాషణను దృశ్యీకరించాలని ఆదేశించారు. పరిష్కారం చూపిన అర్జీలకు సంబంధించి ప్రతి మండలం నుంచి రెండు కేస్‌ స్టడీలను తనకు పంపించాలన్నారు. ‘గడప గడపకూ మన ప్రభుత్వం’ కింద చేపట్టిన పనులు వేగవంతం చేయాలని ఆదేశించారు. పంచాయతీల వారీగా కాకుండా శివారు గ్రామాల వారీగా ఉపాధి హామీ పనులు కేటాయించాలన్నారు. ఐటీడీఏ పీవో విష్ణుచరణ్‌, డీఆర్వో వెంకటరావు, డ్వామా పీడీ రామచంద్రరావు, డీజీపీవో సత్యనారాయణ పాల్గొన్నారు.