లక్ష్యాన్ని సాధించి.. మృత్యువుకు తలవంచి

లారీ ఢీకొని సీఆర్పీఎఫ్‌ జవాను దుర్మరణం

ఉద్యోగ సాధనలో సఫలమైన ఆ యువకుడు మృత్యువుతో పోరాడి ఓడిపోయాడు. శిక్షణ పూర్తి చేసుకుని సంతోషంగా స్వగ్రామానికి చేరుకున్న అతడు మృత్యువు విసిరిన పాశం నుంచి తప్పించుకోలేకపోయాడు. లారీ రూపంలో వచ్చిన చావు నుంచి బయట పడాలని, ఎలాగైనా బతకాలన్న ఆశతో కొన ఊపిరిలోనూ.. రక్షించాలంటూ ప్రాధేయపడ్డాడు. చివరికి మృత్యువు ఎదుట తలవంచి, కన్నవారికి శోకాన్ని మిగిల్చి వెళ్లిపోయాడు.

కాశీబుగ్గ, సోంపేట, న్యూస్‌టుడే: కాశీబుగ్గ సమీపంలోని కోసంగిపురం కూడలిలో ఇసుక లారీ ఢీకొన్న ఘటనలో సీఆర్పీఎఫ్‌ జవాను మంగళవారం మృతి చెందారు. పోలీసులు తెలిపిన వివరాల ప్రకారం.. సోంపేట మండలం జీడిపుట్టుగకు చెందిన సీహెచ్‌ చిరంజీవి అలియాస్‌ చైతన్య(28) 7 నెలల కిందట సీఆర్పీఎఫ్‌ జవానుగా ఎంపికయ్యాడు. బిహార్‌లో శిక్షణ పూర్తి చేసుకొని సెలవుపై ఈ నెల 17న స్వగ్రామం వచ్చాడు. వజ్రపుకొత్తూరు మండలం అమలపాడులోని బంధువుల ఇంటికి మంగళవారం ద్విచక్ర వాహనంపై వెళ్తుండగా వెనుక నుంచి లారీ ఢీకొంది. ఈ ప్రమాదంలో చిరంజీవి లారీ వెనుక చక్రాల మధ్య చిక్కుకుపోయాడు. నడుమ భాగం నుంచి కాళ్ల వరకు తీవ్రగాయాలయ్యాయి. తనను రక్షించాలని ప్రాధేయపడుతూ స్పృహ కోల్పోయాడు. విషయం తెలుసుకున్న హైవే పోలీసుసిబ్బంది పలాస ప్రభుత్వాసుపత్రికి తరలించగా చికిత్స పొందుతూ మృతి చెందాడు. చిరంజీవి తండ్రి కోటేశ్వరరావు ఏడాది కిందట గుండెపోటుతో మృతి చెందారు. తల్లి అన్నపూర్ణ, సోదరుడు ఉన్నారు. కేసు నమోదు చేసినట్లు ఎస్సై వెంకటరావు పేర్కొన్నారు.