ఓట్లు దండుకునేందుకు వైకాపా కుట్ర

ప్రసంగిస్తున్న బలగ ప్రహర్ష, చిత్రంలో టీఎన్‌ఎస్‌ఎఫ్‌ నాయకులు

గుజరాతీపేట(శ్రీకాకుళం), న్యూస్‌టుడే: యువతను మత్తుకు బానిస చేసి ఓట్లు దండుకునేందుకు వైకాపా కుట్ర చేస్తోందని, దీన్ని అంతా సమర్థంగా తిప్పికొట్టాలని తెలుగునాడు విద్యార్థి సమాఖ్య(టీఎన్‌ఎస్‌ఎఫ్‌) జిల్లా అధ్యక్షుడు బలగ ప్రహర్ష పిలుపునిచ్చారు. శ్రీకాకుళం నగరంలోని తెదేపా జిల్లా కార్యాలయంలో బుధవారం నిర్వహించిన విలేకరుల సమావేశంలో ఆయన మాట్లాడారు. రాష్ట్రంలోని అన్ని జిల్లాల్లో గంజాయి, డ్రగ్స్‌ విచ్చలవిడిగా దొరుకుతున్నాయని, కళాశాల విద్యార్థులు వీటికి బానిసలవుతున్నారని ఆరోపించారు. అభివృద్ధిలో మొదటి స్థానంలో ఉండే ఆంధ్రప్రదేశ్‌.. నేడు డ్రగ్స్‌ వినియోగంలో అగ్రస్థానానికి చేరుకుందని విమర్శించారు. ఇప్పటికైనా యువత మేల్కొని వైకాపా ప్రభుత్వాన్ని సాగనంపాలని కోరారు. అనంతరం గోడపత్రికను ఆవిష్కరించారు. టీఎన్‌ఎస్‌ఎఫ్‌ జిల్లా ప్రధాన కార్యదర్శి సుమంత్‌గుర్రాల, ఉపాధ్యక్షులు బి.సంతోష్‌, నియోజకవర్గ అధ్యక్షుడు రెడ్డి గిరిజాశంకర్‌, తదితరులు పాల్గొన్నారు.