జీతాలు పెంచాలని ఆందోళన

నినాదాలు చేస్తున్న కార్మికులు, నాయకులు

కలెక్టరేట్‌, న్యూస్‌టుడే: తమను రెగ్యులర్‌ చేసి, జీతాలు పెంచాలని, కరవు భత్యం, మధ్యంతర భృతి, ఇతర సదుపాయాలు కల్పించాలని మున్సిపల్‌ కాంట్రాక్ట్‌ కార్మికులు బుధవారం కలెక్టరేట్‌ వద్ద ఆందోళన చేపట్టారు. ఈ సందర్భంగా వీరికి మద్దతు తెలిపిన సీఐటీయూ జిల్లా ప్రధాన కార్యదర్శి టి.వి.రమణ మాట్లాడుతూ.. ఎన్నికల సమయంలో సేవల్ని క్రమబద్ధీకరిస్తామని హామీ ఇచ్చిన సీఎం జగన్‌మోహన్‌రెడ్డి మాట తప్పారన్నారు. వెంటనే కార్మికుల సమస్యలపై స్పందించి, న్యాయం చేయాలని డిమాండు చేశారు. సీఐటీయూ నాయకులు బి.సుధారాణి, కె.సురేష్‌, మున్సిపల్‌ యూనియన్‌ నాయకులు కుమారి, రమ, హరిబాబు, బాల తదితరులు పాల్గొన్నారు.