అవినీతిపై అధికారపార్టీ కౌన్సిలర్ల వాకౌట్‌

బయటకు వెళ్లిపోతున్న కౌన్సిలర్లు

బొబ్బిలి, న్యూస్‌టుడే:  బొబ్బిలి పురపాలక సమావేశం రసాభాసగా మారింది. మంగళవారం పుర పాలిక అధ్యక్షుడు సావు వెంకట మురళీకృష్ణ అధ్యక్షతన జరిగిన సమావేశంలో అధికార, ప్రతిపక్ష కౌన్సిలర్లు సభ నుంచి అర్ధంతరంగా బయటకు వెళ్లిపోవడంతో కుర్చీలు ఖాళీ అయ్యాయి. హాజరైన ఎమ్మెల్యే శంబంగి వెంకట చిన అప్పలనాయుడు సమక్షంలో ఇలా జరగడం గమనార్హం. ఇంజినీరింగు, పారిశుద్ధ్యం విభాగంలో పెద్ద ఎత్తున అవినీతి జరుగుతోందని, ఇంధన బిల్లుల పేరిట రూ.లక్షలు కాజేస్తున్నారని అధికార పార్టీ సభ్యులు ఆరోపించారు. మరోవైపు వాటర్‌ వర్క్సు విభాగంలో తొలగిస్తున్న పాత సామగ్రికి కాళ్లొస్తున్నాయని, దీనిపై సమగ్ర దర్యాప్తు చేయాలని డిమాండు చేస్తూ సుమారు 10 పది మంది అధికారపక్ష సభ్యులు సమావేశం నుంచి బయటకు వెళ్లిపోయారు. వారి వెంట తెదేపాకు చెందిన మరో 10 మంది కౌన్సిలర్లు కూడా వెళ్లిపోవడంతో ప్రాంగణం బోసిపోయింది. ఎమ్మెల్యే కూడా ఆశ్చర్యం వ్యక్తం చేస్తూ దీనిపై సమగ్ర దర్యాప్తు నిర్వహించాలని అధికారులను ఆదేశించారు.