వృద్ధులు, వికలాంగుల ఓట్లకు వల

పార్వతీపురం, గ్రామీణం, న్యూస్‌టుడే: దివ్యాంగులు, 85 ఏళ్లు దాటిన వయోవృద్ధులు, మంచంపై లేవలేని పరిస్థితిలో ఉన్నవారు ఇంటి దగ్గరే ఓటుహక్కును వినియోగించుకునేలా ఎన్నికల సంఘం వెసులుబాటు ఇచ్చింది. ఇదే అదనుగా అధికార పార్టీ.. వాలంటీర్లతో వారి ఓట్లను కొల్లగొట్టే ప్రయత్నం చేస్తోంది. ఇప్పటికే పార్వతీపురం మన్యం జిల్లా పార్వతీపురం మండలం పెదబొండపల్లిలో ఇద్దరు వాలంటీర్లను ఇదే విషయమై తొలగించారు. తాజాగా చినబొండపల్లిలో 70 మంది దివ్యాంగులు, వయోవృద్ధుల నుంచి వాలంటీర్లు అంగీకార పత్రాలు తీసుకున్నట్లు ఆ గ్రామ మాజీ సర్పంచి, తెదేపా మండల అధ్యక్షుడు బోను చంద్రమౌళీశ్వరరావు ఎంపీడీవోకు ఫిర్యాదు చేశారు. దీనిపై ఎంపీడీవో ఆకిబ్‌ జావేద్‌ వద్ద ‘న్యూస్‌టుడే’ ప్రస్తావించగా ఫిర్యాదు వచ్చిందని, గురువారం గ్రామంలో దర్యాప్తు నిర్వహిస్తామని తెలిపారు.