రూ.6.47 కోట్ల బంగారం, వెండి వస్తువుల స్వాధీనం

వాహనంలో వస్తువులు ఉన్న పార్సిళ్లను పరిశీలిస్తున్న అధికారులు

డెంకాడ, న్యూస్‌టుడే: వ్యానులో తరలిస్తున్న రూ.6.47 కోట్ల విలువజేసే బంగారం, వెండి వస్తువులను విజయనగరం జిల్లా డెంకాడ మండలం మోదవలస చెక్‌పోస్టు వద్ద పోలీసులు శుక్రవారం రాత్రి పట్టుకున్నారు. దీనికి సంబంధించి భోగాపురం సీఐ వెంకటేశ్వరరావు, డెంకాడ ఎస్‌ఐ కృష్ణమూర్తి తెలిపిన వివరాల ప్రకారం... ముంబయి, దిల్లీ, చెన్నై తదితర ప్రాంతాల నుంచి బి.వి.సి.లాజిస్టిక్స్‌ కొరియర్‌ పార్సిల్‌ సర్వీసు ద్వారా విజయనగరంలోని ఆరు ప్రముఖ జ్యూయలరీ దుకాణాల పేరుతో రూ.6.47 కోట్ల విలువైన 10 కిలోల బంగారం ఆభరణాలు, 17 కిలోల వెండి వస్తువులు రవాణా అవుతున్నాయి. వీటిని విశాఖపట్నంలోని మురళీనగర్‌లోని కొరియర్‌ సర్వీసు బ్రాంచ్‌ కార్యాలయం ద్వారా ఆయా దుకాణాలకు శుక్రవారం రాత్రి వ్యానులో రవాణా చేస్తున్నారు. వాహన తనిఖీల్లో భాగంగా మోదవలస చెక్‌పోస్టు వద్ద పోలీసులు తనిఖీలు నిర్వహించగా భారీగా వస్తువులు గుర్తించి సీజ్‌ చేశారు. వీటికి సంబంధించిన బిల్లులు ఉన్నప్పటికీ ఎన్నికల కమిషన్‌ నుంచి అనుమతి పత్రం లేకపోవడంతో స్వాధీనం చేసుకుని, దర్యాప్తు చేస్తున్నట్లు సీఐ వెంకటేశ్వరరావు తెలిపారు. దుకాణదారులు కొనుగోలు చేశారా? లేక ఎన్నికల్లో పంపిణీ కోసం తెస్తున్నారా? అన్న కోణంలో పోలీసులు దర్యాప్తు చేపట్టారు.