ఓటింగ్‌ శాతం పెంపునకు కృషి

మాట్లాడుతున్న పరిశీలకులు హనీష్‌ చాబ్రా, తలాత్‌ పర్వేజ్‌

విజయనగరం అర్బన్‌, న్యూస్‌టుడే: జిల్లాలో ఓటింగ్‌ శాతం పెంచేందుకు చర్యలు తీసుకోవాలని ఎన్నికల పరిశీలకులు హనీష్‌ చాబ్రా, తలాత్‌ పర్వేజ్‌ కోరారు. ఓట్ల స్లిప్పులను పూర్తి వివరాలతో శతశాతం పంపిణీ చేయాలని ఆదేశించారు. కలెక్టరేట్‌లో శుక్రవారం సాయంత్రం జరిగిన సమావేశంలో వారు మాట్లాడారు. మారుమూల ప్రాంతాలు, గిరిజన ప్రాంతాలకు సిబ్బంది చేరుకునేందుకు అనువైన వాహనాలను సమకూర్చాలన్నారు. నామినేషన్‌ ప్రక్రియ పూర్తయినందున కోడ్‌ ఉల్లంఘనలు జరిగే అవకాశముందని, ప్రత్యేక దృష్టి సారించాలని చెప్పారు. పోలింగ్‌ కేంద్రాల్లోకి చరవాణులు, కెమెరాలకు అనుమతి లేదని స్పష్టం చేశారు. పోలీసు విభాగం పరిశీలకుడు సచీంద్ర పటేల్‌ మాట్లాడుతూ శాంతియుత వాతావరణంలో పోలింగ్‌ జరిగేలా చర్యలు తీసుకోవాలన్నారు. శనివారం ఉదయం 10.30 గంటల నుంచి 11.30 వరకు పోలీసు అతిథిగృహంలో ఫిర్యాదులు స్వీకరించనున్నామని, చరవాణి ద్వారా తెలియజేయాలనుకుంటే 70751 96069 నంబరును సంప్రదించాలన్నారు. కలెక్టర్‌ నాగలక్ష్మి, ఎస్పీ దీపిక ఎం.పాటిల్‌, సంయుక్త కలెక్టర్‌ కె.కార్తీక్‌, సహాయ కలెక్టర్‌ వెంకట త్రివినాగ్‌, డీఆర్వో ఎస్‌.డి.అనిత పాల్గొన్నారు.