నియోజకవర్గాలకు ఈవీఎంల కేటాయింపు పూర్తి

వివిధ రాజకీయ పార్టీల ప్రతినిధుల సమక్షంలో బ్యాలెట్‌ పేపర్‌ బాక్స్‌కు సీల్‌ వేస్తున్న సిబ్బంది

వరంగల్‌ కలెక్టరేట్‌, న్యూస్‌టుడే: వరంగల్‌ లోక్‌సభ ఎన్నికలకు సంబంధించి ఈ నెల 13న పోలింగ్‌ నేపథ్యంలో పార్లమెంట్‌ పరిధిలోని 5 నియోజక వర్గాలకు ఈవీఎంలు కేటాయించినట్లు రిటర్నింగ్‌ అధికారి ప్రావీణ్య తెలిపారు. కలెక్టరేట్‌ సమావేశ మందిరంలో ఎన్నికల సాధారణ పరిశీలకురాలు బండారి స్వాగత్‌ రణ్వీర్‌చంద్‌, వివిధ రాజకీయ పార్టీల ప్రతినిధుల సమక్షంలో శనివారం 5 నియోజకవర్గాలకు సంబంధించిన ఈవీఎంల రెండోదశ ర్యాండమైజేషన్‌ను ఆమె పూర్తి చేశారు. వచ్చే ఆదివారం ర్యాండమైజేషన్‌ ద్వారా మిగిలిన వరంగల్‌ పశ్చిమ, పరకాల నియోజకవర్గాలకు ఈవీఎంలను కేటాయిస్తామన్నారు. అనంతరం పోస్టల్‌ బ్యాలెట్‌ ఓట్లను భద్రపరిచే బ్యాలెట్‌ పేపర్‌ బాక్స్‌కు వివిధ రాజకీయ పార్టీల ప్రతినిధుల సమక్షంలో ఎన్నికల సిబ్బంది సీల్‌ వేశారు. అదనపు కలెక్టర్‌ సంధ్యారాణి, డీఆర్వో శ్రీనివాస్‌, ఆర్డీఓ సిడాం దత్తు తదితరులు పాల్గొన్నారు.