అంతర్గత కలహాలపై కాంగ్రెస్‌ అధిష్ఠానం సీరియస్‌

రంగంపేట, న్యూస్‌టుడే: లోక్‌సభ ఎన్నికలకు పోలింగ్‌ తేదీ సమీపిస్తున్న సమయంలో ఉమ్మడి వరంగల్‌ జిల్లాకు చెందిన  ప్రజాప్రతినిధులు పరస్పర విమర్శలు చేసుకోవడాన్ని కాంగ్రెస్‌ అధిష్ఠానం సీరియస్‌గా తీసుకుంది. వర్షాన్ని సైతం లెక్క చేయకుండా మంగళవారం రాత్రి సీఎం రేవంత్‌రెడ్డి వరంగల్‌ పర్యటనకు వచ్చారు. ఇలాంటి సమయంలో మంత్రి కొండా సురేఖ, పరకాల ఎమ్మెల్యే రేవూరి ప్రకాశ్‌రెడ్డి మధ్య చరవాణిలో జరిగిన సంభాషణ ఆడియో బయటకు రావడంపై టీపీసీసీ తీవ్రంగా పరిగణించింది. బుధవారం వివిధ దినపత్రికల్లో ప్రచురితమైన కథనాల క్లిప్పింగ్‌లను కొందరు జిల్లా నాయకులు ఏఐసీసీ ప్రధాన కార్యదర్శి కేసీ వేణుగోపాల్‌, హైదరాబాద్‌లోని గాంధీ భవన్‌కు పంపించారు. మంత్రి, ఎమ్మెల్యే మధ్య దూరం పెరగడానికి గల కారణాలు, ఇతర అంశాలపై నిఘా వర్గాలు సైతం ఆరా తీశాయి. ఇటీవల జరిగిన చేరికలతో పరకాల, వరంగల్‌ తూర్పు నియోజకవర్గాల్లో విభేదాలు బయటపడ్డాయని గుర్తించారు. నాయకుల మధ్య ఏమైనా విభేదాలుంటే లోక్‌సభ ఎన్నికల తర్వాత మాట్లాడుకుందాం, వరంగల్‌ ఎంపీ అభ్యర్థి గెలుపు కోసం పనిచేయాలని అధిష్ఠానం సూచించినట్లు సమాచారం.