పిల్లల కిడ్నాప్‌ అంటూ పుకార్లు

కడప మార్గంలో గుమికూడిన జనం

పీలేరు గ్రామీణ, న్యూస్‌టుడే: పీలేరు పట్టణంలో మంగళవారం రాత్రి చిన్న పిల్లల కిడ్నాప్‌ చేశారంటూ పుకార్లు వ్యాపించడం కలకలం రేపింది. స్థానిక కడప మార్గంలో ముగ్గురు యువకులు నడుచుకుంటూ వెళుతుండగా కొంత మంది యువకులు వారిని అడ్డగించి ఎవరని ప్రశ్నించారు. వారు ఇతర రాష్ట్రాలకు చెందిన వారు కావడంతో అనుమానం వచ్చి దేహశుద్ధి చేశారు. ఇదే దృశ్యాలను వీడియోల్లో చిత్రీకరించి చిన్న పిల్లలను కిడ్నాప్‌ చేసే దుండగులను పట్టుకున్నారని వైరల్‌ చేశారు. సమాచారం అందుకున్న పోలీసులు ఘటనా స్థలానికి చేరుకుని అనుమానితులను అదుపులోకి తీసుకున్నారు. ఉత్తరప్రదేశ్‌కు చెందిన కొందరు యువకులు పరిసర ప్రాంతాల్లో గ్రానైట్‌ పనులు చేసుకునే వారని తేలడంతో కౌన్సెలింగ్‌ ఇచ్చి పంపామని సీఐ మోహన్‌రెడ్డి వివరించారు. పిల్లల కిడ్నాప్‌ అంటూ వచ్చిన వదంతుల్లో వాస్తవం లేదని, ప్రజలను భయభ్రాంతులకు గురి చేసే వదంతులు సృష్టిస్తే కఠిన చర్యలు తీసుకుంటామని సీఐ హెచ్చరించారు.