TS News: నా ఆత్మహత్యకు మొదటి సూత్రధారి అతనే: మరో సెల్ఫీ వీడియోలో రామకృష్ణ

పాల్వంచ, ఈటీవీ- ఖమ్మం: తన బలవన్మరణానికి మొదటి సూత్రధారి వనమా రాఘవేంద్రరావు అలియాస్‌ రాఘవ అని భద్రాద్రి కొత్తగూడెం జిల్లా పాల్వంచలో ఈనెల 3న కుటుంబంతో సహా ఆత్మహత్య చేసుకున్న నాగ రామకృష్ణ పేర్కొన్నారు. ఆయన ఆత్మహత్య చేసుకోవడానికి ముందు చేసిన సెల్ఫీ వీడియో మరోటి శుక్రవారం వెలుగుచూసింది. వివరాలు ఆయన మాటల్లోనే.. ‘నా నాన్న పేరు మండిగ చిట్టబ్బాయి. తూర్పుగోదావరి జిల్లా మోతుగూడెంలో ఆరోగ్య శాఖలో హెల్త్‌ ఇన్‌స్పెక్టర్‌గా పనిచేసేవారు. 1992లో నాకు 13 ఏళ్ల వయసులో మావోయిస్టులు అమర్చిన మందుపాతర పేలి మా నాన్న మృతిచెందారు. మీరు ఈ వీడియో చూసే సమయానికి నేను బతికి ఉంటాననో లేదో తెలీదు.

నా పరిస్థితికి సూత్రధారి రాఘవ. నా అక్క మాధవి, మా తల్లి సూర్యవతి సహకరించారు. 20 ఏళ్లుగా మా అక్కతో వనమా రాఘవకు వివాహేతర సంబంధం ఉంది. ఈ ముగ్గురూ కలిసి తండ్రి ద్వారా న్యాయబద్ధంగా నాకు రావాల్సిన ఆస్తిని అడ్డుకున్నారు. అమ్మ రిటైరయ్యే ముందు 2020 నవంబరులో పెద్దమనుషుల సమక్షంలో వాటాలు తేల్చుకున్నాం. ఏడాది నుంచి వాటాలు పంచకుండా నా పరిస్థితిని చావుదాకా తీసుకొచ్చారు. మా సొంత స్థలం పోలవరం మండలం పాత పట్టిసీమ. మా స్వస్థలానికి ఏ సంబంధం లేని రాఘవ ఆస్తి పంపకాల విషయంలో జోక్యం చేసుకుంటున్నారు.

అక్కకు పోలవరంలో రెండు ఎకరాలు, రాజమండ్రిలో రెండు ఇళ్ల స్థలాలు, గోకవరంలో 200 గజాల స్థలం, అమ్మ రిటైర్‌మెంట్‌ డబ్బులో కూడా వాటా ఇచ్చాం. నేను రాజమండ్రిలో అద్దె ఇల్లులో ఉంటున్నా. ఇద్దరు ఆడపిల్లలు. వారి చదువులు, కుటుంబం గడవడానికి సంపాదించుకోవాలి. సుమారు రూ.30లక్షలు అప్పులు అయ్యాయి. న్యాయం జరగదనే కుటుంబం సహా బలవన్మరణానికి పాల్పడుతున్నా. నాకు అప్పులిచ్చిన వారికి అన్యాయం చేయొద్దు’ అని రామకృష్ణ వీడియోలో తెలిపారు. కుటుంబం ఆత్మహత్య కేసులో ఆరోపణలు ఎదుర్కొంటున్న రాఘవను నిన్న రాత్రి పోలీసులు అరెస్టు చేసిన విషయం తెలిసిందే.