ఈసీని కోరిన సామాజిక కార్యకర్తలు

దిల్లీ: లోక్‌సభ ఎన్నికల్లో ఇప్పటిదాకా జరిగిన మూడు దశల పోలింగులో బూత్‌ల వారీగా పోలైన మొత్తం ఓట్ల వివరాలను ఈసీ వెబ్‌సైటులో ప్రచురించాలని పలువురు సామాజిక కార్యకర్తలు, న్యాయవాదులు, పదవీ విరమణ పొందిన సివిల్‌ సర్వెంట్లు డిమాండ్‌ చేశారు. ఈ మేరకు గురువారం ఎన్నికల సంఘానికి వారు లేఖ రాశారు. పటిష్ఠమైన ప్రజాస్వామ్య పనితీరు నిర్ధారణకు ఎన్నికల ప్రక్రియపై ప్రజావిశ్వాసం కీలకమని అందులో పేర్కొన్నారు. ఈసీ ప్రకటించిన మొదటి రెండు దశల పోలింగు గణాంకాల్లో హెచ్చతగ్గులు ఎక్కువగా ఉన్నాయని ఆక్షేపించారు. ఆయా నియోజకవర్గాల్లో బూత్‌ల వారీగా నమోదైన ఓట్ల వాస్తవ గణాంకాలు అభ్యర్థుల వద్ద అందుబాటులో ఉంటాయని ఈసీ ఇప్పటికే ప్రకటించిన విషయం విదితమే. ఎన్నికల సంఘానికి రాసిన లేఖలో ప్రశాంత్‌ భూషణ్‌, వృందా గ్రోవర్‌, అంజలీ భరద్వాజ్‌, విపుల్‌ ముద్గల్‌, షబ్నం హష్మీ, జయతీ ఘోష్‌, శైలేష్‌ గాంధీ, ఎం.జి.దేవసహాయం తదితరులు సంతకాలు చేశారు.