‘పత్తి కొనుగోళ్లపై ఆంక్షలు ఎత్తివేయండి’

సీసీఐ ఎండీకి మంత్రి నిరంజన్‌రెడ్డి లేఖ

హైదరాబాద్‌: ఆంక్షల పేరుతో పత్తి రైతులను ఇబ్బందులకు గురిచేయవద్దని తెలంగాణ వ్యవసాయశాఖ మంత్రి సింగిరెడ్డి నిరంజన్‌రెడ్డి కేంద్రాన్ని కోరారు. ఈ మేరకు కాటన్‌ కార్పొరేషన్‌ ఆఫ్ ఇండియా (సీసీఐ) సీఎండీకి ఆయన లేఖ రాశారు. పత్తి కొనుగోలుకు ప్రస్తుతం సీజన్‌ నడుస్తున్నందున రోజువారీ గరిష్ఠ పరిమితి తొలగించి.. మార్కెట్‌కు వస్తున్న మొత్తం పత్తిని కొనుగోలు చేయాలని నిరంజన్‌రెడ్డి విజ్ఞప్తి చేశారు. ఇప్పుడు కీలక సమయమని.. ఆంక్షలు విధించడం వల్ల రైతులు ఆందోళన చెందుతున్నారని లేఖలో ఆయన పేర్కొన్నారు. వరంగల్‌, మహబూబ్‌నగర్ రీజియన్లలో రోజుకు 15వేల బేళ్లు, ఆదిలాబాద్ రీజియన్‌లో రోజుకు 10వేల బేళ్లు మాత్రమే కొనాలని అధికారులకు సీసీఐ ఆదేశాలిచ్చిందని, దీని వల్ల రైతులకు తీవ్ర ఇబ్బందులు ఎదురవుతాయని మంత్రి సీఎండీ దృష్టికి తీసుకెళ్లారు. నిల్వ సామర్థ్యం లేని కొనుగోలు కేంద్రాలు ఉన్న చోట నుంచి సమీప కేంద్రాలకు రైతులను మళ్లించే విధంగా చర్యలు తీసుకుంటామని.. కొనుగోళ్లు మాత్రం పెంచాలని నిరంజన్‌రెడ్డి కోరారు. ప్రస్తుతం విధించిన ఆంక్షలను ఎత్తివేయాలని ఆయన విజ్ఞప్తి చేశారు.