యానాంలో టోర్నడో బీభత్సం

యానాం: తూర్పుగోదావరి జిల్లా యానాంలో టోర్నడో బీభత్సం సృష్టించింది. నియోజకవర్గంలోని అయ్యన్ననగర్‌ లంకలో మొదలైన సుడిగాలి క్రమేపి బలం పుంజుకొని ఇరవై నిమిషాలపాటు రొయ్యల చెరువుల్లో అలజడి సృష్టించింది.  సుడిగాలి దాటికి సుమారు 12 ఎకరాల విస్తీర్ణంలో ఉన్న రొయ్యల చెరువుల్లో నీరు ఏనుగు తొండం తరహాలో మేఘాల్లోకి వెళ్లిపోయింది. నీటితోపాటు ఆ చెరువుల్లోని రొయ్యలు, చిన్న చిన్న మోటార్ ఇంజన్‌లు, వాటి తీగలు ఆ సుడిలోకి వెళ్లి దూరంగా ఇతర ప్రాంతాల్లో చెల్లాచెదురై పడ్డాయి. 
అయ్యన్ననగర్ గ్రామం మీదుగా వెళ్తూ సుడిగాలి బలహీనపడింది . ఈ క్రమంలో కొన్ని ఇళ్ల పైన నిర్మించిన రేకుల షెడ్లు కూలిపోయాయి. కొన్ని చెట్లు కిందపడ్డాయి. దీనివల్ల జరిగిన నష్టాన్ని రెవెన్యూ అధికారులు పరిశీలించారు. డిప్యూటీ తహసీల్దార్ జి.సత్యనారాయణ, తదితరులు ఘటన స్థలాన్ని పరిశీలించారు.