DSC: ఉపాధ్యాయ పోస్టుల భర్తీకి త్వరలోనే డీఎస్సీ: మంత్రి బొత్స

విజయనగరం గ్రామీణం: ఉపాధ్యాయ పోస్టుల భర్తీకి త్వరలోనే నోటిఫికేషన్ విడుదల చేస్తామని విద్యాశాఖ మంత్రి బొత్స సత్యనారాయణ తెలిపారు. దీనికి సంబంధించిన ఫైలు ముఖ్యమంత్రి వద్ద ఉందని చెప్పారు. మంగళవారం విజయనగరం జిల్లా రాజాంలో ఆయన విలేకరులతో మాట్లాడారు. వాలంటీర్లపై జనసేన అధినేత పవన్ కళ్యాణ్ చేసిన వ్యాఖ్యలను ఆయన ఖండించారు. ఇష్టానుసారంగా మాట్లాడవద్దని హితవు పలికారు. ఇలాంటి తప్పుడు వ్యాఖ్యలు భవిష్యత్తులో చేయవద్దని కోరారు. సచివాలయాలు, రైతు భరోసా కేంద్రాలు ఇతర ప్రభుత్వ భవనాల నిర్మాణాలు వేగవంతం చేయాలని, నిర్మాణాలు పూర్తి చేసిన వాటిని వెంటనే అప్పగించాలని గుత్తేదారులకు సూచించారు. నిర్మాణాలు పూర్తి చేసిన గుత్తేదారులకు బిల్లులు తప్పనిసరిగా ఇప్పించే బాధ్యత తీసుకుంటామని చెప్పారు.