PRC : చర్చలకు మేం సిద్ధమే.. మాటలతో రాకుండా చేస్తున్నారు: సూర్యనారాయణ

అమరావతి: తమతో చర్చలకు ప్రభుత్వం ఓపెన్‌ మైండ్‌తో లేదని పీఆర్సీ సాధన సమితి నేత సూర్యనారాయణ వ్యాఖ్యానించారు. ప్రభుత్వంతో చర్చలు జరిపి సమస్యల పరిష్కారానికి తాము సిద్ధమని తెలిపారు. మాటల ద్వారా మమ్మల్ని చర్చలకు రాకుండా చేస్తున్నారని చెప్పారు. చర్చలకు ముందు ప్రభుత్వం తన వైఖరి మార్చుకోవాలని సూచించారు. కాగితాలపై పుట్టిన సంఘాలతో చర్చించి న్యాయం చేసినా మంచిదేనని వ్యాఖ్యానించారు. సమస్యలపై తాము ఇప్పటికే వందల దరఖాస్తులు ఇచ్చామని గుర్తు చేశారు. తాము ఇచ్చిన 859 అభ్యర్థనలు పెండింగ్‌ ఉన్నాయని సీఎస్ చెప్పారని సూర్యనారాయణ పేర్కొన్నారు.

పాత జీతాలనే ఇవ్వాలి: బొప్పరాజు

ఉద్యమాన్ని నీరుగార్చేందుకు ప్రభుత్వం ప్రయత్నిస్తోందని మరో నేత బొప్పరాజు వెంకటేశ్వర్లు ఆరోపించారు. మూడు డిమాండ్లపై లేఖ ఇచ్చి పరిష్కరించాలని కోరామన్నారు. చర్చలకు వచ్చినప్పుడల్లా మమ్మల్ని మోసం చేస్తున్నారని చెప్పారు. చర్చలకు తాము ఎప్పుడూ సిద్ధంగానే ఉంటామని స్పష్టం చేశారు. ఉద్యోగ సంఘాలను ఇలా అవమానించడాన్ని ఎప్పుడూ చూడలేదని పేర్కొన్నారు. ప్రభుత్వానికి చిత్తశుద్ధి ఉంటే పాత జీతాలనే ఇవ్వాలని తెలిపారు.