Bhaskar Reddy: భాస్కర్‌రెడ్డి ఎస్కార్ట్‌ బెయిల్‌ నవంబరు 10 వరకు పొడిగించిన సీబీఐ కోర్టు

హైదరాబాద్‌: మాజీ మంత్రి వైఎస్‌ వివేకానందరెడ్డి హత్య కేసులో నిందితుడు భాస్కర్‌రెడ్డి ఎస్కార్ట్‌ బెయిల్‌ను నవంబరు 10 వరకు పొడిగిస్తూ సీబీఐ కోర్టు ఆదేశాలు జారీ చేసింది. ఎస్కార్ట్‌ బెయిల్‌ మరో రెండు నెలలు పొడిగించాలని కోరతూ భాస్కర్‌రెడ్డి దాఖలు చేసిన పిటిషన్‌పై సీబీఐ కోర్టులో విచారణ జరిగింది. వైద్యుడు లేకపోవడంతో అక్టోబరు 18న చికిత్స జరగలేదని ఆయన తరఫు న్యాయవాది కోర్టు దృష్టికి తెచ్చారు. ఎస్కార్ట్‌ బెయిల్‌ పొడిగింపు కోసం ఏదో ఒక కారణం చూపుతున్నారని సీబీఐ అభ్యంతరం తెలిపింది. భాస్కర్‌రెడ్డి ఆరోగ్యంపై వాస్తవాలు తేల్చేందుకు ఇద్దరు వైద్యులతో మెడికల్‌ బోర్డు ఏర్పాటు చేయాలని డీఎంఈకి సీబీఐ కోర్టు ఆదేశించింది. ఎస్కార్ట్‌ బెయిల్‌ను నవంబరు 10 వరకు పొడిగిస్తూ.. పిటిషన్‌పై తదుపరి విచారణ నవంబరు 8కి వాయిదా వేసింది.