ఏఎన్‌యూ విద్యార్థులపై సస్పెన్షన్‌ ఎత్తివేత

అమరావతి: ‘జై అమరావతి’ నినాదాలు చేసినందుకుగానూ నలుగురు విద్యార్థులపై ఆచార్య నాగార్జున యూనివర్సిటీ(ఏఎన్‌యూ) విధించిన సస్పెన్షన్‌ను యాజమాన్యం ఎత్తివేసింది. వివిధ వర్గాల నుంచి వచ్చిన ఒత్తిళ్ల నేపథ్యంలో ఈ నిర్ణయం తీసుకుంది. రెండు రోజుల క్రితం విద్యార్థి ఐకాస చేపట్టిన నిరసనలో ఈ నలుగురు విద్యార్థులు పాల్గొని రాజధానిపై నినాదాలు చేసినందుకు సస్పెన్షన్‌కు గురయ్యారు.

యూనివర్సిటీ ఎదుట విద్యార్థుల ధర్నా

యూనివర్సిటీ వీసీ రాజీనామా చేయాలని డిమాండ్‌ చేస్తూ ఏఎన్‌యూ ఎదుట ఇవాళ విద్యార్థులు ధర్నాకు దిగారు. అమరావతి పరిరక్షణ విద్యార్థి యువజన ఐకాస నేతృత్వంలో ఆందోళన చేపట్టారు. దీంతో యూనివర్సిటీ పరిసరాల్లో పోలీసులు భారీగా మోహరించారు.