పీవీ సింధు సందేశం:వీడియో విడుదల చేసిన జగన్‌

అమరావతి: ప్రభుత్వ శాఖల్లో ఎట్టిపరిస్థితుల్లోనూ అవినీతి ఉండకూడదని ఏపీ సీఎం వైఎస్‌ జగన్‌ మోహన్‌ రెడ్డి స్పష్టం చేశారు. అవినీతిని అరికట్టేందుకు ఏర్పాటు చేసిన 14400 టోల్‌ఫ్రీ నంబర్‌పై ప్రచార వీడియోలను సీఎం విడుదల చేశారు. ప్రముఖ బ్యాడ్మింటన్‌ క్రీడాకారిణి పీవీ సింధు సందేశంతో ఈ వీడియోను విడుదల చేశారు. ‘ఏపీ సీఎం జగన్‌ మోహన్‌ రెడ్డి అవినీతి రహిత సమాజం కోసం కృషి చేస్తున్నారు. ఎవరు అవినీతికి పాల్పడినా నిర్భయంగా మీ గొంతు వినిపించండి. వెంటనే 14400 అనే టోల్‌ఫ్రీ నంబర్‌కు సమాచారమివ్వండి’ అని పీవీ సింధు వీడియో సందేశంలో పేర్కొన్నారు. చట్టవ్యతిరేక కార్యకలాపాలు, ఇసుక మాఫియాకు ప్రతి ఒక్కరూ దూరంగా ఉండాలని సీఎం జగన్‌ సూచించారు. రాష్ట్రంలో అవినీతి నిర్మూలనకు కట్టుబడి ఉన్నామని సీఎం స్పష్టం చేశారు.