క్యాన్సర్‌ బాధితులకు కురుల దానం

కోయంబత్తూర్‌: ఇతరులను ఆదుకునేందుకు ఆస్తులు అంతస్తులేమీ అవసరం లేదు.. సాయం చేయాలన్న మంచి మనసుంటే చాలని తమిళనాడు రాష్ట్రం కోయంబత్తూర్‌లోని ఓ ప్రైవేటు కళాశాల విద్యార్థినులు మరోసారి నిరూపించారు. క్యాన్సర్‌ బాధితులకు తమ కురులను దానం చేసి శెభాష్‌ అనిపించారు. క్యాన్సర్‌ చికిత్స తీసుకుంటున్న వారికి సహజంగా జుట్టు ఊడిపోతుంది. అలాంటి వారి కోసం విగ్గులు తయారు చేసేందుకు తమ జుట్టు ఉపయోగపడుతుందని సదరు విద్యార్థినులు చెబుతున్నారు. క్యాన్సర్‌ బాధితులను ఆర్థికంగా సాయం చేసే స్తోమత తమకు లేదని, అందువల్ల తమ జుట్టే వారికి ఎంతో కొంత సాయంగా నిలుస్తుందన్న ఆశతో దానం చేశామని వినోదిని అనే విద్యార్థిని మీడియాకు తెలిపారు.

ఇప్పటి వరకు 80 మంది విద్యార్థినులు తమ శిరోజాలను దానం చేసేందుకు రిజిస్టర్‌ చేసుకున్నారని, మరో 200 మందికిపైగా కురులను దానం చేసేందుకు సిద్ధంగా ఉన్నారని సదరు విద్యార్థిని చెప్పుకొచ్చింది. ఇదే విషయాన్ని సామాజిక మాధ్యమాల్లో పోస్టు చేయగా.. వాళ్ల ఆలోచనను పలువురు అభినందిస్తున్నారు.