Vitamin b12: ‘విటమిన్‌ బి-12’ లోపించిందా! వీటిని ఆహారంగా తీసుకోండి!

ఇంటర్నెట్‌ డెస్క్‌: మన వంటింట్లో ఉండే ఆహారమే అయినా మనకు ఏ ఆహారంలో ఏ పోషక విలువలు ఉన్నాయో తెలియదు. దీంతో ఎన్నో అనారోగ్య సమస్యలు వస్తుంటాయి. మనకు అందుబాటులోనే ఉండి అత్యంత పోషకాలు కలిగిన ఆహార పదార్థాలేవో తెలుసుకుందామా! 

‘విటమిన్‌ బి-12’ రక్తంలో చక్కెర స్థాయిని నియంత్రిస్తుంది. ఇది లోపించినట్లయితే మెగా లోబ్లాస్టిక్‌ అనీమియా(రక్త హీనత)కు దారి తీసే అవకాశాలు ఉన్నాయి. అయితే ఈ విటమిన్‌ ఎక్కువగా జంతువుల నుంచి ఉత్పత్తి అయ్యే ఆహార పదార్థాలలో ఎక్కువగా ఉంటుంది. 

పెరుగు: విటమిన్‌-12 పుష్కలంగా దొరికే వాటిల్లో పెరుగు ఒకటి. రోజులో కావాల్సిన విటమిన్‌-12 ఒక కప్పు పెరుగులో 28శాతం లభిస్తుంది. విటమిన్‌ లోపంతో బాధపడుతున్నవారు రోజూ పెరుగును ఆహారంతో పాటు తీసుకోవడం మంచిది.

పోషకాలున్న ఈస్ట్‌: పోషకాలున్న ఈస్ట్‌ ఒక చెంచాలో 5ఎమ్‌సీజీ విటమిన్‌-12 ఉంటుంది. ఈ ఈస్ట్‌ను పాప్‌కార్న్‌, గిలకొట్టిన గుడ్లు, సూపులు, పాస్తాలలో కలుపుకుని తీసుకోవచ్చు.

పాలు: ఒక కప్పు పాలలో రోజుకి కావాల్సిన కాల్షియం 20శాతం ఉంటుంది. రోజూ పాలు తాగడం వల్ల విటమిన్‌-12ను శరీరానికి అందించవచ్చు.

తృణధాన్యాలు: తృణధాన్యాలు అన్ని రకాలుగా శరీరానికి మేలు చేస్తాయి. ఒక కప్పు తృణధాన్యాలను ఉదయం అల్పాహారంగా తీసుకోవాలి. దీంతో విటమిన్‌-12 పొందేందుకు వీలుంటుంది. ఓట్స్‌ ఫ్లేక్స్‌, కార్న్‌ఫ్లేక్స్‌ తీసుకోవటం మంచిది. 

సోయా పన్నీర్‌: టోఫుల గురించి విన్నారా! అవునండీ సోయా పాలతో చేసిన టోఫుల్లో విటమిన్-12 పుష్కలంగా దొరుకుతుంది. దీనిని బీన్‌ పెరుగు అని కూడా అంటారు. చపాతీ, అన్నంలోకి రుచిగా ఉంటుంది. లేదా నూనెలో వేయించి సలాడ్‌లో కూడా కలిపి తీసుకోవచ్చు. వీటిని మీ రోజువారి ఆహారంలో చేర్చుకోండి. తద్వారా విటమిన్‌-12 సమస్యను అధిగమించవచ్చు.