Rajastan: గిన్నిస్‌ రికార్డుకెక్కిన సామూహిక వివాహాలు!

జయపుర: దేశంలో అప్పుడప్పుడు ఎక్కడో ఒకచోట సామూహిక వివాహాలు జరుగుతుంటాయి. అయితే, రాజస్థాన్‌ (Rajastan)లో జరిగిన సామూహిక వివాహాల వేడుక మాత్రం ఏకంగా గిన్నిస్‌ రికార్డు (Guinness World Record)లోకెక్కింది. 12 గంటల్లో ఎక్కువమంది పెళ్లిళ్లు చేసుకొని ప్రపంచ రికార్డు సృష్టించారు. బరాన్‌ ప్రాంతంలో మే 26న మొత్తం 2,413 జంటలు పెళ్లి చేసుకొని ఒక్కటయ్యాయి. దీంతో 2013లో 24 గంటల్లో యెమెన్‌లో 963 జంటలు ఒకేసారి వివాహం చేసుకున్న రికార్డు బద్ధలైంది. 

రాజస్థాన్‌లోని అట్టడుగు వర్గాలకు చెందిన జంటలకు శ్రీ మహవీర్‌ గోశాల కల్యాణ్‌ సంస్థాన్‌ సామూహిక వివాహాలు చేయిస్తుంటుంది. ఈ క్రమంలోనే ఇటీవల అత్యధికంగా హిందూ, ముస్లిం జంటలకు వివాహాలు జరిపించి గిన్నిస్‌ రికార్డుకెక్కేలా చేసింది. సామూహిక వివాహాల్లో పేర్లు నమోదు చేసుకున్న వధువరులు సమయం వృథా చేయకుండా ముందుగానే పూలదండలు మార్చుకొని మండపానికి చేరుకున్నారు. ప్రతి జంట 6 గంటల్లోపే వారి మత.. సంప్రదాయాల ప్రకారం వివాహం చేసుకుంది.  

ఈ వివాహ వేడుక పూర్తికాగానే అధికారులు ఆయా జంటలకు వివాహ ధ్రువపత్రం అందజేశారు. దాంతోపాటు వధువుకు ఆభరణాలు, బెడ్‌, వంటగది సామగ్రి, టీవీ, ఫ్రిజ్‌, కూలర్‌ తదితర గృహోపకరణాలు కానుకగా ఇచ్చారు. ఈ జంటలకు రాజస్థాన్‌ సీఎం అశోక్‌ గహ్లోత్‌, మంత్రి ప్రమోద్‌ జైన్‌ భయా శుభాకాంక్షలు తెలిపారు.