బర్డ్‌ఫ్లూ.. ఆ ప్రాంతంలో 3 నెలలు చికెన్‌ షాపులు మూసేయాలి: నెల్లూరు కలెక్టర్‌

నెల్లూరు: జిల్లాలో బర్డ్‌ఫ్లూ వ్యాప్తి చెందకుండా చర్యలు చేపట్టాలని సంబంధిత అధికారులను కలెక్టర్‌ హరినారాయణ్‌ ఆదేశించారు. వ్యాధి ప్రబలకుండా సమన్వయంతో పనిచేయాలని సూచించారు. ‘‘పొదలకూరు మండలం చాటగుట్ల, కోవూరు మండలం గుమ్మళ్లదిబ్బలో కోళ్లు చనిపోయాయి. కోళ్లు మృతి చెందిన ప్రాంతానికి 10 కి.మీ పరిధిలో 3 రోజులు చికెన్‌ షాపులు మూసేయాలి. ఒక కిలోమీటర్‌ పరిధిలో మూడు నెలల వరకు షాపులు తెరవకూడదు. చనిపోయిన వాటిని భూమిలో పాతిపెట్టాలి.. పనిచేసేవారు జాగ్రత్తగా ఉండాలి. ఆ 2 గ్రామాల్లో డీపీవో, జిల్లా పరిషత్‌ సీఈవో గ్రామసభలు నిర్వహించాలి. ప్రజలు, కోళ్ల పెంపకందారులు, చికెన్‌ షాప్‌ యజమానుల్లో చైతన్యం తేవాలి. ఆయా గ్రామాల పరిధిలో శానిటైజేషన్‌ చేయించాలి’’ అని కలెక్టర్‌ సూచించారు.