TS High court: ప్రజాభవన్‌ వద్ద కారు ప్రమాదం కేసు.. సాహిల్‌కు హైకోర్టులో ఊరట

హైదరాబాద్‌ : బేగంపేట ప్రజాభవన్‌ (Praja Bhavan Accident) వద్ద జరిగిన కారు ప్రమాదం కేసులో బోధన్‌ మాజీ ఎమ్మెల్యే షకీల్‌ (Former MLA Shakeel) కుమారుడు సాహిల్‌కు ఊరట లభించింది. సాహిల్‌ను అరెస్టు చేయొద్దని పంజాగుట్ట పోలీసులను హైకోర్టు ఆదేశించింది. దర్యాప్తునకు సహకరించాలని, ఈనెల 17న పోలీసుల ఎదుట హాజరుకావాలని ఉన్నత న్యాయస్థానం ఆదేశాలు జారీ చేసింది.

పంజాగుట్ట పీఎస్‌లో నమోదైన కేసులో పేరును తొలగించాలని సాహిల్‌ తరఫు న్యాయవాది హైకోర్టులో పిటిషన్‌ దాఖలు చేశారు. నిర్లక్ష్యంగా డ్రైవింగ్‌ చేసినందుకే పంజాగుట్ట పోలీసులు లుక్‌ ఔట్‌ నోటీసులు జారీ చేశారని ధర్మాసనం దృష్టికి తెచ్చారు. ‘పోలీసులు కావాలని పిటిషనర్‌ పేరును ఎఫ్‌ఐఆర్‌లో చేర్చారు. ప్రత్యక్ష సాక్షిగా ఉన్న కానిస్టేబుల్‌ ఇచ్చిన సమాచారం ఆధారంగా ఆసిఫ్‌ను పోలీసులు నిందితుడిగా చేర్చారు. ఆ తర్వాత ఆసిఫ్‌పై ఒత్తిడి తెచ్చి సాహిల్‌ పేరు చెప్పించారు. గతంలో అతనిపై 15 కేసులు ఉన్నట్టు చూపించారు’’ అని న్యాయవాది తెలిపారు. తప్పు చేయకపోతే నిందితుడు దుబాయ్‌ ఎందుకు పారిపోయారని హైకోర్టు ప్రశ్నించింది. తప్పుడు కేసు బనాయించిన పోలీసులు.. అరెస్టు చేస్తారనే భయంతోనే దుబాయ్‌ వెళ్లాడని న్యాయవాది కోర్టుకు తెలిపారు. కారు ప్రమాద ఘటనకు సంబంధించి కేసు డైరీని సమర్పించాలని పంజాగుట్ట పోలీసులను ఆదేశించిన హైకోర్టు.. తదుపరి విచారణను 24వ తేదీకి వాయిదా వేసింది.