Navy Marathon: 18వేల మందితో విశాఖ సాగర తీరంలో ‘నేవీ మారథాన్’

పెదవాల్తేరు: విశాఖ సాగరతీరంలో నిర్వహించిన నేవీ మారథాన్‌ ఉత్సాహంగా సాగింది. శారీరక, మానసిక ఆరోగ్యంపై అవగాహన కల్పిస్తూ నిర్వహించిన ఫుల్‌ మారథాన్‌ (42కె), ఆఫ్‌ మారథాన్‌ (21కె), 10కె, 5కె విభాగాల్లో దాదాపు 18 వేల మంది యువతీ యువకులు పాల్గొని పరుగులు తీశారు. 

తొలుత ఆర్కేబీచ్‌ సమీపంలోని కాళీమాత ఆలయ ఆవరణలో నేవీ అధికారులు, సినీనటులు మిలింద్‌ సోమన్‌, అడివి శేష్‌ జెండా ఊపి ఈ మారథాన్‌లను ప్రారంభించారు. ఫుల్‌ మారథాన్‌ ఐఎన్‌ఎస్‌ కళింగ వద్ద ముగిసింది. నేవీ ఉద్యోగులు, వివిధ స్వచ్ఛంద సంస్థల ప్రతినిధులు, యువత సాగర తీరానికి తరలిరావడంతో ఫుల్‌ జోష్‌ నెలకొంది. ప్రతిభ కనబరిచిన వారికి నిర్వాహకులు అవార్డులు, నగదు బహుమతులు ప్రదానం చేశారు.