చివరి కోరిక వెల్లడించని నిర్భయ దోషులు

దిల్లీ: దేశవ్యాప్తంగా సంచలనం సృష్టించిన నిర్భయ కేసు ఎట్టకేలకు పరిసమాప్తం అయ్యింది. నలుగురు దోషులను దిల్లీలోని తిహార్‌ జైలులో ఒకేసారి ఉరితీశారు. ముకేశ్‌ సింగ్‌ (32), పవన్‌ గుప్త (25), వినయ్‌ శర్మ (26), అక్షయ్‌ కుమార్‌ సింగ్‌ (31)ను ఉరి తీసేముందు చివరి కోరికలు ఏమైనా ఉన్నాయా అని జైలు అధికారులు అడగ్గా వారు ఎలాంటి సమాధానం ఇవ్వలేదు. అనంతరం ఉరితీత ప్రక్రియను పూర్తి చేశారు. నలుగురు దోషులు మరణించారని వైద్యులు ధ్రువీకరించిన తర్వాత వారి మృతదేహాలను శవాగారానికి తరలించారు.  రాత్రంతా ఈ నలుగురు దోషులను ప్రత్యేకంగా వేర్వేరు గదుల్లో ఉంచినట్లు తెలుస్తోంది. ఉదయం 5:30 గంటలకు 17 సిబ్బంది మధ్య వారిని ఉరితీశారు. ఈ సమాచారం బయటకు తెలియగానే తీహార్‌ జైలు ఎదుట పెద్ద సంఖ్యలో ప్రజలు గుమిగూడి మిఠాయిలు పంచుకున్నారు.