గనిలో చిక్కుకొని.. 96 గంటలు తవ్వి..

ఓ బొగ్గు గనిలో చిక్కుకున్న నలుగురు కార్మికులు 96 గంటల పాటు నిర్విరామంగా తవ్వి ప్రాణాలను కాపాడుకున్నారు. ఎన్డీఆర్‌ఎఫ్‌, పోలీసులు సాయం అందించలేకపోయినా వారే స్వయంగా గని నుంచి బయటపడ్డారు. ఝార్ఖండ్‌ బొకారో బొగ్గు గనిలో ఈ ఘటన జరిగింది. పర్వత్‌పుర్‌ బ్లాక్‌లో పని చేసే  శ్రవణ్‌ రజ్వార్‌, లక్ష్మణ్‌ రజ్వార్‌ అనాడి సింగ్‌, భరత్‌ సింగ్‌ నవంబరు 26న గనిలో ప్రమాదం జరిగినప్పుడు తప్పిపోయారు. శిథిలాల కింద చిక్కుకున్న మరికొంతమంది కార్మికులను స్థానికులు కాపాడారు. మరుసటి రోజు పోలీసులు ఘటనా స్థలానికి చేరుకున్నారు. ఎన్డీఆర్‌ఎఫ్‌ సిబ్బంది కూడా రంగంలోకి దిగారు. ఎన్ని ప్రయత్నాలు చేసిన ఈ నలుగురిని బయటకు తీసుకురాలేకపోయారు. వీరు మాత్రం జీవితంపై ఆశలు వదులుకోలేదు. తమ వద్ద ఉన్న పార, గునపాలతో తవ్వడం ప్రారంభించారు. అలా 96 గంటల పాటు నిర్విరామంగా తవ్వి గని నుంచి ప్రాణాలతో బయటపడ్డారు. తమ నలుగురి వద్ద టార్చి లైట్లు ఉన్నాయని, వాటిని సద్వినియోగం చేసుకునేందుకు ఒక టార్చిని ఉపయోగిస్తున్నప్పుడు మిగతా వాటిని వాడలేదని కార్మికులు చెప్పారు. నాలుగు రోజుల పాటు కేవలం నీళ్లు తాగినట్లు వెల్లడించారు.