ఇతర రకాల కంటే ఒమిక్రాన్‌ తీవ్రత తక్కువే

ఆసుపత్రిలో చేరాల్సినవారి సంఖ్యా స్వల్పమే

 దక్షిణాఫ్రికా అధ్యయనంలో వెల్లడి 

జొహన్నెస్‌బర్గ్‌: కరోనాలో ఇతర రకాలతో పోలిస్తే కొత్తదైన ఒమిక్రాన్‌ తీవ్రత తక్కువేనని, ఆసుపత్రిలో చేరాల్సి వస్తున్నవారి సంఖ్యా స్వల్పమేనని దక్షిణాఫ్రికాలో ఒక అధ్యయనంలో తేలింది. దీనిని నిపుణులు ఇంకా సమీక్షించాల్సి ఉంది. ఒమిక్రాన్‌ కేసులు ఎక్కువగా వచ్చిన తొలి నాలుగు వారాల్లో ఆసుపత్రుల్లో చేరిన రోగుల వివరాలను పరిశోధకులు విశ్లేషించారు. గౌటెంగ్‌ ప్రావిన్సులో బీటా, డెల్టా రకాలు మొదటి నాలుగు వారాల్లో చూపిన తీవ్రతను, ఒమిక్రాన్‌ ఉద్ధృతిని వీరు పోల్చిచూశారు. ప్రయోగశాలల నుంచి పీసీఆర్, యాంటీజెన్‌ పరీక్షల పాజిటివ్‌ కేసుల వివరాలను పరిశీలించారు. మూడు ఉద్ధృతుల్లో తీవ్రతను మదించడానికి గణిత నమూనాలపై ఆధారపడ్డారు. రెండు, మూడు ఉద్ధృతుల్లో వరసగా 18.9%, 13.7% మంది ఆసుపత్రుల్లో చేరాల్సి వస్తే ప్రస్తుతం అది 4.9% మించలేదు. వైరస్‌ తీవ్రత ఎక్కువగా ఉన్న కేసులు 2, 3 ఉద్ధృతుల్లో 60.1%, 66.9% ఉంటే ఇప్పుడు 28.8 శాతం ఉన్నాయి. డెల్టా రకంతో పోలిస్తే ఆసుపత్రుల్లో చేరాల్సిన వారు 73% తక్కువే ఉంటారని పరిశోధకుల అంచనా.