త్వరగా అస్సాం వీడండి

శిందేకు అస్సాం పీసీసీ అధ్యక్షుడి లేఖ

ఈనాడు, గువాహటి: మహారాష్ట్రలోని ఎంవీఏ ప్రభుత్వాన్ని కూల్చడానికి శివసేన అసమ్మతి ఎమ్మెల్యేలు గువాహటి హోటల్‌లో బస చేయడం అస్సాం ప్రజలకు నచ్చడం లేదని ఆ రాష్ట్ర ప్రదేశ్‌ కాంగ్రెస్‌ కమిటీ అధ్యక్షుడు భూపేన్‌ బొరా అన్నారు. వీలైనంత త్వరగా ఇక్కడి నుంచి వెళ్లిపోవాలని సూచిస్తూ తిరుగుబాటు నేత ఏక్‌నాథ్‌ శిందేకు శుక్రవారం బొరా లేఖ రాశారు. ఈ ఉత్తరాన్ని రాడిసన్‌ బ్లూ హోటల్‌ వద్ద విధుల్లో ఉన్న ఒక పోలీసు అధికారి ద్వారా అసమ్మతి నేత శిందేకు పంపించినట్లు తెలిపారు. అస్సాంలోని మొత్తం 35 జిల్లాలకు గాను 32 జిల్లాల ప్రజలు వరదలతో సతమతమవుతున్నారని, ఈ సమయంలో గువాహటిలో మహారాష్ట్ర ఎమ్మెల్యేలు బస చేయడం, వారికి రాజభోగాలు కల్పించడంలో రాష్ట్ర ప్రభుత్వం నిమగ్నమవడం ఏమాత్రం సబబుగాలేదన్నారు. ప్రజాస్వామ్య విలువలు, విధేయతల పట్ల గౌరవం లేని ఎమ్మెల్యేలకు ఆతిథ్యమిచ్చి అస్సాం అపకీర్తిని మూటకట్టుకుందన్నారు.