భారత గళాన్ని ప్రపంచం శ్రద్ధగా వింటోంది

దిల్లీ: భారత ఉత్పత్తులతోపాటు, దేశ గళం ప్రపంచవ్యాప్తంగా ప్రాచుర్యం పొందుతోందని ప్రధాని నరేంద్రమోదీ అన్నారు. దేశ గళాన్ని యావత్తు ప్రపంచం ఇప్పుడు మరింత శ్రద్ధగా వింటోందని పేర్కొన్నారు. ప్రధాని రాజస్థాన్‌లోని జైపూర్‌లో పత్రికా గేట్‌ను ప్రారంభించి, గ్రూప్ ఛైర్మన్ గులాబ్ కొఠారి రచించిన రెండు పుస్తకాలను వీడియో కాన్ఫరెన్స్ ద్వారా విడుదల చేశారు. ఈ సందర్భంగా ఆయన మాట్లాడుతూ యువతరం పుస్తకాలు చదవడాన్ని అలవాటుగా చేసుకోవాలని సూచించారు. పుస్తకాలు జీవితంలో భాగమవ్వాలని పేర్కొన్నారు. గూగుల్‌ వచ్చినంతమాత్రాన అపారమైన జ్ఞానాన్ని అందించే పుస్తకాలు చదవడాన్ని విస్మరించొద్దని సూచించారు. భారత మీడియా సైతం ప్రపంచ నలుమూలలకు విస్తరించాల్సిన అవసరం ఉందన్నారు. కరోనాపై ప్రజల్లో అవగాహన కల్పించడంలో మీడియా ముఖ్య భూమిక పోషించిందన్నారు. ప్రభుత్వ పనులను విశ్లేషించడం, లోపాలను ఎత్తిచూపడం ద్వారా ప్రజలకు అపూర్వ సేవలు అందిస్తోందని కొనియాడారు.