Japan: జపాన్​ ప్రధానిగా మరోసారి ఎన్నికైన కిషిదా

టోక్యో: జపాన్‌ ప్రధానమంత్రిగా ఫుమియో కిషిదా (64) మళ్లీ ఎన్నికయ్యారు. బుధవారం జరిగిన ఓటింగ్​లో.. ఆయన ప్రధాని పదవి చేపట్టేందుకు పార్లమెంట్​ సభ్యులు ఆమోదం తెలిపారు. ఈ నేపథ్యంలో కొత్తగా ఎన్నికైన సభ్యులతో కేబినెట్​ను ఏర్పాటు చేయనున్నారు. అయితే నెల రోజుల క్రితమే ప్రధానిగా ఎన్నికైన కిషిడా.. పార్లమెంట్ దిగువసభను రద్దు చేసి మళ్లీ ఎన్నికలకు వెళ్లారు. ఇటీవల జరిగిన ఎన్నికల్లో కిషిదా ప్రాతినిధ్యం వహిస్తున్న లిబరల్‌ డెమొక్రాటిక్‌ పార్టీ.. 465 మంది సభ్యులు గల పార్లమెంట్‌ దిగువ సభలో 261 సీట్లు సాధించింది. ఈ ఫలితంతో కిషిదా పూర్తిస్వేచ్ఛతో నిర్ణయాలు తీసుకునే అవకాశం కలిగింది.

కిషిదా గతంలో జపాన్‌ విదేశాంగ శాఖ మంత్రిగా పనిచేశారు. జపాన్‌కు సుదీర్ఘ కాలంపాటు ప్రధానమంత్రిగా పనిచేసిన షింజో అబే అనారోగ్య కారణాలతో గతేడాది ఆగస్టు నెలలో తన బాధ్యతల నుంచి తప్పుకొన్నారు. అనంతరం ఆ బాధ్యతలను స్వీకరించిన 72ఏళ్ల యోషిహిడే సుగా ఏడాది గడవకముందే పదవి నుంచి తప్పుకున్నారు. మరోసారి ఈ బాధ్యతలు చేపట్టేందుకు సిద్ధంగా లేనని స్పష్టం చేశారు. ఈ నేపథ్యంలోనే అధికార లిబరల్‌ డెమొక్రాటిక్‌ పార్టీ నిర్వహించిన సంస్థాగత ఎన్నికల్లో ఫుమియో కిషిదాకు భారీ మద్దతు లభించింది. ప్రధాని పదవి చేపట్టాక దిగువసభ రద్దు చేసి ఎన్నికలకు వెళ్లిన ఫుమియో కిషిదా పూర్తి మెజార్టీతో విజయం సాధించి ప్రధానమంత్రి పీఠాన్ని మళ్లీ దక్కించుకున్నారు.