Joe Biden: ఆస్ట్రేలియా ప్రధాని పేరు మర్చిపోయిన బైడెన్‌..!

వాషింగ్టన్‌: చైనా దూకుడుకు అడ్డుకట్ట వేసే లక్ష్యంతో యూఎస్‌, బ్రిటన్, ఆస్ట్రేలియా మధ్య కీలక రక్షణ ఒప్పందం కుదిరింది. దానిలో భాగంగా అమెరికా అధ్యక్షుడు జో బైడెన్, బ్రిటన్, ఆస్ట్రేలియా ప్రధానులు బోరిస్‌ జాన్సన్‌, స్కాట్ మోరిసన్ మధ్య వర్చువల్ సమావేశం జరిగింది. ఆ సమయంలో మాట్లాడిన బైడెన్.. ఆస్ట్రేలియా ప్రధాని పేరు మర్చిపోయారు. తమ ప్రధాని పేరు మర్చిపోవడంతో అక్కడి ప్రజలు, మీడియాలో హాట్‌ టాపిక్‌గా మారింది. 

చైనాకు చెక్‌ పెట్టేందుకు ఈ మూడు దేశాలు కలిసి AUKUS కూటమిగా ఏర్పడ్డాయి. దీని కింద అణు జలాంతర్గాములను సమకూర్చుకునేందుకు ఆస్ట్రేలియాకు అమెరికా, బ్రిటన్ సహకరించనున్నాయి. ఇండో-పసిఫిక్ ప్రాంతంలో స్థిరత్వాన్ని ప్రోత్సహించే లక్ష్యంతో ఈ ఒప్పందం జరిగింది. ఈ సందర్భంగా బైడెన్‌ మాట్లాడుతూ.. మొదట యూకే ప్రధాని బోరిస్‌కు కృతజ్ఞతలు తెలిపారు. తర్వాత ఆస్ట్రేలియా ప్రధాని వైపు తిరిగి సహచరుడు అని అర్థం వచ్చేలా సంబోధించి, కృతజ్ఞతలు తెలియజేశారు. ఆ సమయంలో మోరిసన్ పేరు మర్చిపోయినట్లు కనిపించింది. అయితే, తర్వాత కొనసాగించిన ఉపన్యాసంలో మాత్రం ప్రధాని పేరును ప్రస్తావించారు. 

ఆయన సంబోధించిన #ThatFellaDownUnder అనే పదం ఇప్పుడు సామాజిక మాధ్యమాల్లో వైరల్‌గా మారింది. దీనిపై ఆస్ట్రేలియా మీడియా భిన్నాభిప్రాయం వ్యక్తం చేసింది. కొన్ని సంస్థలు అసంతృప్తి వ్యక్తం చేయగా.. ఓ సంస్థ మాత్రం దీనివల్ల అసలు ఉద్దేశం మరుగునపడదని వ్యాఖ్యానించింది.